नोकरीच्या आमिषाने १५ लाख रुपयांची फसवणूक
नवी मुंबई, ता. ७ (वार्ताहर) : मंत्रालयात कामाला असल्याचे भासवून एका भामट्याने व त्याच्या साथीदाराने घणसोलीत राहणाऱ्या पिता पुत्राकडून तब्बल १५ लाख रुपये उकळून त्यांची फसवणूक केल्याचे उघडकीस आले आहे. संदीप लक्ष्मण साळुंके पाटील व राज पानसरे अशी या दोघांची नावे असून त्यांनी राज्य उत्पादन शुल्क विभागात चांगल्या ठिकाणी पोस्टिंग करून देण्याच्या बहाण्याने ही फसवणूक केली आहे. या दोघांनी अशाच पद्धतीने अनेकांची फसवणूक केली असण्याची शक्यता व्यक्त करण्यात येत आहे. त्यानुसार पोलिसांनी या दोघांचा शोध सुरू केला आहे.
या प्रकरणातील तक्रारदार प्रभाकर राठोड हे घणसोलीत राहण्यास असून त्यांचा मुलगा २०२३ मध्ये राज्य उत्पादन शुल्क विभागात पोलिस उपनिरीक्षक म्हणून भरती झाला होता. त्यानंतर त्यांचा मुलगा प्रशिक्षण घेत असताना, घणसोलीत राहणाऱ्या भामट्या राज पानसरे याने राठोड यांना संपर्क साधून त्याचा नातेवाईक संदीप लक्ष्मण साळुंखे पाटील हा मंत्रालयात कामाला असल्याचे सांगितले होते. तसेच साळुंखे पाटील याच्या माध्यमातून त्याच्या मुलाला मुंबई भरारी पथकात पोस्टिंग करून देण्याचे आमिष दाखविले हेते. तसेच त्याने राठोड यांच्याकडून पाच लाख रुपये उकळले होते. मात्र त्यावेळी राठोड यांच्या मुलाची पोस्टिंग अकार्यकारी शाखेत झाली होती. त्यानंतर दुसरा भामटा संदीप लक्ष्मण साळुंखे पाटील याने राठोड यांना संपर्क साधून त्यांच्या मुलाला मुंबई आणि ठाणे जिल्ह्यात कार्यकारी पदावर पोस्टिंग करून देण्याच्या बहाण्याने त्यांच्याकडून आणखी १० लाख रुपये उकळले. मात्र त्यानंतरदेखील राठोड यांच्या मुलाला चांगली पोस्टिंग मिळाली नाही. त्यानंतर संदीप लक्ष्मण साळुंखे पाटील व राज पानसरे या दोघांनी फसवणूक केल्याचे लक्षात आल्यानंतर राठोड यांनी राज पानसरे याच्याकडे आपले सर्व पैसे परत मागितले. मात्र त्याने उलट त्यांना धमकावून पिटाळून लावले. त्यामुळे राठोड यांनी रबाळे पोलिस ठाण्यात या दोघांविरोधात तक्रार दाखल केली आहे. या तक्रारीनुसार रबाळे पोलिसांनी गुन्हा दाखल करून पुढील तपास सुरू केला आहे.