तरुणीचा विनयभंग करणारा अटकेत
नवी मुंबई, ता. ७ (वार्ताहर) : ऐरोली भागात एकाने संगणक शिकवणाऱ्या २२ वर्षीय तरुणीसोबत अश्लील चाळे करून तिचा विनयभंग केल्याचा प्रकार उघडकीस आला आहे. संदीप प्रताप पाटील (वय ३६) असे आरोपीचे नाव असून रबाळे पोलिसांनी त्याच्याविरोधात गुन्हा दाखल करून त्याला अटक केली आहे.
आरोपी संदीप हा घणसोली येथे राहण्यास असून त्याचे ऐरोली सेक्टर तीन भागामध्ये एसआयटी कॉम्प्युटर क्लासेस आहे. याठिकाणी ऐरोलीत राहणारी २२ वर्षीय पीडित तरुणी संगणकाचे प्रशिक्षण देण्यासाठी जात होती. पीडित तरुणी शुक्रवारी (ता. ४) याठिकाणी शिकविण्यासाठी गेली असता आरोपी संदीपने रात्री साडेआठ वाजण्याच्या सुमारास पीडितेसोबत अश्लील चाळे करून तिचा विनयभंग केला. या प्रकारानंतर पीडित तरुणीने घडल्या प्रकाराची माहिती आपल्या कुटुंबीयांना दिल्यानंतर त्यांनी रबाळे पोलिस ठाण्यात तक्रार दाखल केली. त्यानुसार पोलिसांनी संदीप पाटील याच्याविरोधात विनयभंगाचा गुन्हा दाखल करून त्याला अटक केली आहे. न्यायालयाने त्याला एका दिवसाची पोलिस कोठडी ठोठावली होती. त्यानंतर त्याची रवानगी न्यायालयीन कोठडीत केल्याची माहिती पोलिसांनी दिली.