श्रीमलंगगड भागात भातलावणीला वेग
कल्याण, ता. ८ (बातमीदार) : श्रीमलंगगड भागात सध्या भातलावणीला वेग आला आहे. त्यामुळे बळीराजा शेती कामात व्यग्र असलेला दिसून येत आहे. कल्याण पूर्व ग्रामीण भागातील नेवाळी, आंभे, खरड, शेलारपाडा, चिरड, पोसरी, कुंभार्ली, मांगरूळ अशा बहुतांश गावांत शेतीची कामे सुरू आहेत.

कल्याणपासून जवळच्या अंतरावर असलेल्या श्री मलंगगड भागात मोठ्या प्रमाणावर भातशेती केली जाते. सकाळपासूनच शेतकरी आपल्या संपूर्ण कुटुंबासह मदतीला माणसे घेऊन चिखलात उतरून काम करताना दिसत आहेत. बैलजोडी किंवा ट्रॅकटरच्या सहाय्याने शेतात चिखल करून भाताची लागवड केली जाते. कोसळणाऱ्या पावसाच्या सरींपासून बचाव करण्यासाठी प्लॅस्टिक कागद अथवा रेनकोटचा आधार घेत आहेत. त्यातही डोक्यावर पावसाची कितीही रिपरिप असली तरी काम सुरूच ठेवावे लागते.

श्री मलंगगड विभागात अलीकडे शेतीव्यतिरिक्त अनेकांचे स्वतःचे व्यवसाय आहेत, तर काही वर्ग हा नोकरदार तसेच विद्यार्थ्यांचाही आहे. त्यामुळे शेतीच्या कामासाठी आठवडाभर आवर्जून वेळ काढावा लागतो. काहींना वेळ देणे शक्य होत नसल्याने मजुरीवर माणसे आणावी लागतात, तर दुसरीकडे व्यवस्थापन होत नसल्याने काहींना हळूहळू शेती करणेही थांबवावे लागते.