खारघर, ता. ८ (बातमीदार) : खारघर सेक्टर-१२ मध्ये मार्चपासून कमी दाबाने अपुरा पाणीपुरवठा होत आहे. त्‍यामुळे रहिवाशांना बोअरवेल आणि विहिरीच्या पाण्यावर तहान भागवावी लागत आहे.
खारघरमध्ये सर्वात मोठा विभाग असलेल्‍या सेक्टर-१२ मधील लोकसंख्या जवळपास पन्नास हजारांच्या घरात आहे. सिडकोने १९९८-९९ मध्ये बीयुडीपी गृहनिर्माण योजनेंतर्गत अल्प उत्पन्न व मध्यमवर्गीयांसाठी २४, २८, ३२ मीटरची सहा हजारांहून अधिक घरे उपलब्ध करून दिली. २५ वर्षांत बैठ्या चाळीमध्ये दोन ते तीन मजली घरे उभे राहिली असून, लोकसंख्याही वाढली आहे, विभागासाठी टाकण्यात आलेल्या जलवाहिनी जीर्ण झाल्यामुळे तसेच कमी व्यासाची असल्‍याने वर्षभर पाणी समस्‍या भेडसावते. आजही अनेक सोसायटीत कमी दाबाने, अपुरा पाणीपुरवठा होत असल्यामुळे रहिवाशांना ग्रामपंचायत काळात बहुतांश सोसायट्यांमध्ये उभारलेल्‍या पाण्यावर तहान भागवावी लागत आहे, तर काही नागरिक विहिरीच्या पाण्याचा उपयोग करीत आहेत. सिडकोच्या पाणीपुरवठा विभागात विचारणा केली असता, हेटवणे धरणात पाणीसाठा कमी असल्यामुळे पुरवठ्यात अडचणी निर्माण होत असल्याचे नागरिकांना सांगण्यात येते.

खारघर सेक्टर-१२ मध्ये काही महिन्यांपासून कमी दाबाने पाणीपुरवठा होत असल्यामुळे रहिवासी बोअरवेलच्या पाण्यावर दिवस काढीत आहे. सोमवारी सिडकोच्या पाणीपुरवठा विभागातील अधिकाऱ्यांची रहिवाशांनी भेट घेत पाणी समस्‍या मांडली असता, हेटवणे धरणात पाणीसाठा कमी असल्‍याचे सांगण्यात आले. त्‍यामुळे रहिवाशांना टँकरच्या पाण्याशिवाय पर्याय नसल्याचे दिसून येते.
- विजय पाटील, पदाधिकारी, रहिवासी संघ

पिण्यासाठी विकतचे पाणी
मार्चपासून कमी दाबाने पाणीपुरवठा होत असल्यामुळे बोअरवेलच्या पाण्यावर दिवस काढत आहे. बोअरवेलच्या पाण्यामुळे लहान मुलांना त्रास होत आहे. सिडकोकडे विनंती करूनही उपाययोजना केली जात नसल्‍याचे गंगासागर सोसायटीतील रहिवासी चंद्रकांत महाडिक यांनी सांगितले, तर चार महिन्यांपासून सिडकोकडून पाणी उपलब्ध होत नसल्यामुळे अंघोळ, कपडे धुण्यासाठी बोअरवेलचे, तर पिण्यासाठी बिसलेरीचे पाणी विकत घेत असल्‍याचे अमृत वेल सोसायटीतील पुष्पा पुजारी यांनी सांगितले.