कला शिक्षण मंडळाच्या सदस्यपदी दत्तात्रय ठोंबरे
विरार, ता. ८ (बातमीदार) ः मुंबईतील महाराष्ट्र राज्य कला शिक्षण मंडळ यांच्याद्वारे राज्यातील अनुदानित कला महाविद्यालयातील एका प्राचार्यास या नियामक मंडळाचे सदस्य म्हणून घेतले जाते. ही संधी कलाशिक्षण मंडळाने या वेळी वसई विकासिनीच्या रॉबी डिसिल्वा दृक कला महाविद्यालयाचे प्राचार्य दत्तात्रय ठोंबरे यांना दिली आहे.
बोरिवली ते पालघरदरम्यान सर्वात मोठे कला महाविद्यालय असून येथे आतापर्यंत अनेक शिक्षक, कलाकार तयार झाले आहेत. दत्तात्रय ठोंबरे यांची महाराष्ट्र राज्य कला शिक्षक मंडळाच्या सदस्यपदी निवड झाल्याने या संस्थेच्या शिरपेचात मानाचा तुरा खोवला गेला आहे. या निवडीबद्दल संस्थेचे अध्यक्ष नारायण मानकर, कार्याध्यक्ष शिरीष पाठारे, विजय वर्तक, भरत दोषी व जयंत देसले व सर्व कार्यकारिणीने त्यांचे अभिनंदन केले आहे.