विरार, ता. १० (बातमीदार) : दक्षिण भारतातील वेलंकनी मातेचा वार्षिक महोत्सव, नोव्हनाजवळ येत आहे. या महोत्सवासाठी सर्व जाती- धर्माचे हजारो भाविक वेलंकनी मातेचा नवस फेडण्यासाठी, दर्शन घेण्यासाठी व तिची आराधना करण्यासाठी जातात. हा महोत्सव २९ ऑगस्टला ध्वजारोहणाने सुरू होऊन ८ सप्टेंबरला वेलंकनी मातेच्या वाढदिवसानिमित्त मोठा सण साजरा करून समाप्त होतो. या वेलंकनी महोत्सवात सहभागी होण्यासाठी पालघर जिल्ह्यातून मोठ्या संख्येने भाविक जातात. त्यांच्यासाठी जादा ट्रेन सोडण्याची मागणी समाजसेवक आणि प्रवासी संघटक चार्ली रोझारिओ यांनी पश्चिम रेल्वेकडे केली आहे.

भाविकांची गर्दी लक्षात घेता मध्य रेल्वेकडून भाविकांच्या सोयीसाठी प्रत्येक वर्षी एलटीटी ते वेलंकनी व पश्चिम रेल्वेकडून वांद्रे, वसई ते वेलंकनी अशा विशेष रेल्वेचे आयोजन करण्यात येते; परंतु हजारोंच्या संख्येने जाणारे भाविक लक्षात घेता, विशेष गाड्या फारच अपुऱ्या होत आहेत. बऱ्याच भाविकांना तिकीट मिळत नसल्यामुळे त्यांची निराशा होते. यासाठी भाविकांची गर्दी लक्षात घेता पश्चिम रेल्वेकडून वांद्रे ते वेलंकनीसाठी २७ ऑगस्टबरोबरच २८ ऑगस्टला सकाळी एका जादा स्पेशल ट्रेनचे आयोजन करण्याची मागणी पत्रात करण्यात आली आहे.

६ सप्टेंबरला वांद्रे ते वेलंकनीसाठी देण्यात येणाऱ्या स्पेशल ट्रेनबरोबरच एक जादा ट्रेन ७ सप्टेंबरला देण्यात यावी. यामुळे वेलंकनीहून परतीसाठी ८ व ९ सप्टेंबरला वेलंकनी ते वांद्रे अशा ट्रेनची सोय होऊन भाविकांची गैरसोय दूर होईल, असे म्हटले आहे. भाविकांचा योग्य प्रतिसाद पाहून जादा ट्रेनचा विचार केला जाईल, असे उत्तर पश्चिम रेल्वेने दिले आहे.