पालघरमधील सहकारी संस्थांना शासन देणार सहकार पुरस्कार
राज्य शासनाचा कालबद्ध कार्यक्रम जाहीर; प्रस्ताव पाठवण्याची अंतिम तारीख १८ जुलै
विरार, ता. ८ (बातमीदार) ः यंदाचे वर्ष आंतरराष्ट्रीय सहकारिता वर्ष म्हणून घोषित केले आहे. यानुसार राज्याच्या सहकार चळवळीच्या विकासात उत्कृष्ट योगदान देणाऱ्या संस्थांना शासनामार्फत पुरस्कार देऊन गौरविण्यात येणार आहे. त्यासाठी २०२३-२०२४ या आर्थिक वर्षातील कामगिरीच्या आधारावर त्यांचे मूल्यमापन करून पात्र सहकारी संस्थांची निवड करण्याचा कालबद्ध कार्यक्रम शासनाकडून नुकताच जाहीर केला आहे.
यासाठी पालघर जिल्ह्यातील आठही तालुक्यांतील सहकारी संस्थांनी १८ जुलैपर्यंत संबंधित सहाय्यक निबंधक किंवा तालुका उपनिबंधक कार्यालयाकडे रितसर प्रस्ताव सादर करावेत, असे आवाहन पालघर जिल्हा उपनिबंधक शिरीष कुलकर्णी यांनी केले आहे. विशेष म्हणजे राज्य शासन स्तरावरील समितीमार्फत २६ सप्टेंबरपर्यंत पुरस्कार प्राप्त संस्थांची अंतिम निवड करण्यात येणार आहे.

सहकार पुरस्काराचे स्वरूप
या पुरस्कारांतर्गत सहकार महर्षी पुरस्कार-एक, सहकार भूषण-२१ तसेच सहकार निष्ठ-२३ असे एकूण ४५ संस्थांना पुरस्कार देण्यात येणार असून, अनुक्रमे एक लाख, ५१ हजार व २५ हजार आणि स्मृतिचिन्ह व प्रशस्तिपत्र असे या सर्व पुरस्काराचे स्वरूप असणार आहे.

आवश्यक कागदपत्रांसह प्रस्ताव आमंत्रित
पुरस्काराविषयी अधिक माहिती सहकार विभागाच्या अधिकृत संकेतस्थळावर तसेच सर्व जिल्हा उपनिबंधक, तालुका उपनिबंधक, सहाय्यक निबंधक यांच्या कार्यालयात उपलब्ध आहे. महाराष्ट्र सहकारी संस्था अधिनियम १९६० अंतर्गत नोंदणी झालेल्या सहकारी संस्थांनी प्रस्ताव आवश्यक त्या कागदपत्रांसह जिल्ह्यातील त्या-त्या तालुक्याच्या संबंधित सहाय्यक किंवा उपनिबंधक कार्यालयात दाखल करावेत, असेही आवाहन सहकार विभागामार्फत केले.