ठाणे, ता. ९ : समाजाच्या रितीरिवाजाप्रमाणे सहा तोळे सोने तसेच संसारोपयोगी साहित्य दिले होते. तरी पत्नीला हुंड्यासाठी मानसिक तसेच शारीरिक छळ करून तलाख देणाऱ्या पतीविरोधात कळवा पोलिस ठाण्यात गुन्हा दाखल करण्यात आला आहे.
डोळखांब येथे राहणाऱ्या पीडित महिलेचे २०१५ मध्ये मुस्लिम समाजाच्या रितीरिवाजाप्रमाणे लग्न झाले होते. लग्नानंतर पीडित महिला पतीसोबत जुना बेलापूर रोड, कळवा नाका येथे राहत होती. लग्नामध्ये रितीरिवाजाप्रमाणे योग्य मानपान केल्यानंतरही पीडितेला वारंवार शारीरिक तसेच मानसिक त्रास दिला होता. याप्रकरणी भिवंडी तालुका पोलिस ठाण्यात विविध कलमांन्वये गुन्हा दाखल होता. दरम्यान, डिसेंबर २०२४ पीडित महिलेला तिचा पतीने बिल्डिंगखालीच तलाख दिला होता. पीडित महिलेच्या आई-वडिलांनी मध्यस्थी करण्याचा प्रयत्न केला; पण त्यांनाही शिवीगाळ करण्यात आल्याने याप्रकरणी पीडित महिलेने कळवा पोलिस ठाण्यात तक्रार दिली होती.