तारापूर, ता. ९ (बातमीदार) : आकर्षक परताव्याचे प्रलोभन दाखवत आदिवासी महिलांकडून एक कोटीपेक्षा अधिकची रक्कम जमा करून त्याचा परतावा न देता आर्थिक फसवणूक करणाऱ्या पती-पत्नीवर मनोर पोलिस ठाण्यात गुन्हा दाखल करण्यात आला आहे. या प्रकरणात आणखी महिलांची फसवणूक झाल्याचा अंदाज असून गुन्ह्याची व्याप्ती मोठी असल्याने तपास पालघर येथील आर्थिक गुन्हे शाखेकडे वर्ग करण्यात आला आहे.

पालघर तालुक्यातील बहाडोली येथील रूपेश पाटील आणि त्याची पत्नी कल्पना यांच्याविरोधात गुन्हा दाखल आहे. त्यांनी धुकटन परिसरातील मुंबई-बडोदा द्रुतगती महामार्गात संपादित जमिनीचा मोबदला मिळालेल्या कुटुंबातील महिलांना गुंतवलेल्या रकमेवर वार्षिक १५ टक्के व्याज देण्याचे प्रलोभन दाखवत एक कोटीपेक्षा अधिक रक्कम जमा केली. ही रक्कम त्यांनी गुजरातमधील सारनेश्वर सहकारी सोसायटीमध्ये गुंतवल्याचे सांगितले. मुदत पूर्ण झाल्यानंतर गुंतवलेली मूळ रक्कम आणि त्यावरील व्याज परत न भेटल्याने महिलांनी दाम्पत्याकडे पैसे मागण्यास सुरुवात केली; मात्र पुढील काही दिवसांत पैसे देण्याचे अनेकवेळा आश्वासने देऊनदेखील ती पूर्ण करण्यास असमर्थ ठरले. अखेर फसवणूक झालेल्या जवळपास ३० पेक्षा अधिक महिलांनी सामाजिक कार्यकर्त्यांच्या सहकार्याने पोलिस अधीक्षक यतीश देशमुख यांची भेट घेऊन त्यांच्यासमोर आपली कैफियत मांडली.

आदिवासी महिलांच्या आर्थिक फसवणुकीप्रकरणी तक्रार दिल्यानंतर दाम्पत्याविरोधात गुन्हा दाखल करण्यात आला आहे. आतापर्यंत ३० महिलांची एक कोटी १८ लाखांची रक्कम त्यांना परत करण्यात आली नसल्याचे समोर आले आहे. या गुन्ह्याची व्याप्ती मोठी असून १३५ जणांकडून जवळपास सात कोटींपेक्षा अधिक रक्कम जमा केल्याचे समोर आले आहे. या गुन्हाचा तपास पोलिस उपनिरीक्षक धनराज शिरसाट हे करीत आहेत.