पेण, ता. ९ (वार्ताहर) : काही दिवसांपासून भाज्यांचे भाव वाढत असून, पेणच्या बाजारपेठेत मटार २४०, तर घेवडा २०० रुपये किलोने विकला जात आहे. श्रावण महिन्याच्या आधीच भाज्या महाग झाल्याने महिलावर्गातून नाराजी व्यक्त होत आहे. पेण तालुक्याच्या डोंगराळ भागातून रानभाज्‍या विक्रीसाठी बाजारात दाखल झाल्‍या आहेत, मात्र त्‍या भाज्‍यांचे भावही गतवर्षीच्या तुलनेत जास्‍त आहेत.
यंदा महिनाभर आधीच पावसाला सुरुवात झाल्‍याने शेती तसेच भाजीपाला लागवडीसाठी पुरेसा अवधी मिळालेला नाही. आवक कमी असल्‍याने नवी मुंबई, वाशी, पुणे, नाशिक यांसारख्या मुख्य बाजारपेठेबरोबरच पेणच्या बाजारातही भाज्यांचे भाव वाढले आहेत. सध्या बाजारपेठेत मटार २४०, तर घेवडा २०० रुपये किलो, तर डोंगराळ भागातून शहरात येणाऱ्या शिराळा, दुधी, वांगी, काकडी या भाज्‍या ८० ते १०० रुपये किलोने विकल्या जात आहेत. याशिवाय माठ, पालक, चाकवत, मेथी, कांदापात अशा भाज्या प्रतिजुडी पन्नास रुपये आहेत.

भाज्यांचे भाव प्रतिकिलो रुपयांत
मटार- २४०
घेवडा- २००
फरसबी - १६०
गवार- १६०
शेवगा १६०
सिमला मिरची- १२०
भेंडी- १२०
पडवळ- १२०
वांगी- १००
फ्लावर- १००
कारले-१००
टोमॅटो- ५०

पेण बाजारपेठेत आठ-दहा दिवसांपासून भाज्यांचे भाव खूप वाढले आहेत. रोजच्या जेवणातील मटार, घेवडा, गवार, शेवग्याच्या शेंगा दोनशेपार पोहोचल्‍या आहेत. त्यामुळे खरेदी करताना हात आखडता घ्यावा लागतो. मुंबईवरून येणाऱ्या आणि स्‍थानिक गावठी भाज्यांची आवक कमी असल्‍याने भाव वाढले आहेत. त्‍यामुळे दैनंदिन बजेट कोलमडले आहे.
- पुनम पाटील, गृहिणी

मुंबई परिसरातील मुख्य बाजारासह पुणे, नाशिक या बाजारपेठेत भाज्यांचे भाव चढेच आहेत, आवक कमी असल्याने पेण बाजारपेठेतही भाज्‍या महागल्‍या आहेत. त्‍यात गावठी भाज्‍यांची आवक अद्याप सुरू न झाल्‍याने पुढील काही दिवस भाव चढेच राहण्याची शक्‍यता आहे.
- सलिल शेठ, भाजीविक्रेते