स्थानिक प्रकल्पग्रस्त पाल्यांना शालेय प्रवेशात प्राधान्य मिळावे
तुर्भे, ता. ९ (बातमीदार) ः सुपरसिटी म्हणून संबोधल्या जाणाऱ्या नवी मुंबई शहरातील विद्यार्थी शिक्षणाच्या प्रवाहात यावेत, तसेच कोणीही विद्यार्थी शिक्षणापासून वंचित राहू नये, यासाठी नवी मुंबई पालिकेच्या माध्यमातून सीवूड्स, कोपरखैरणे आणि सारसोळे येथे सीबीएसई बोर्डाच्या शाळा सुरू केल्या आहेत. या शाळांना मोठ्या प्रमाणात प्रतिसाद मिळत आहे. तर येथील गाव-गावठाणातील स्थानिक प्रकल्पग्रस्तांच्या पाल्यांना प्रवेश प्रक्रियेत आरक्षित २५ टक्‍के प्राधान्य देण्यात यावे, अशी मागणी करावेगाव ग्रामस्थ सुधार समितीचे अध्यक्ष योगेश तांडेल यांनी केली आहे.
नवी मुंबई महापालिकेने शहरातील शाळांच्या प्रशस्त इमारती उभारल्या असून, विद्यार्थ्यांना शिक्षणाच्या अत्याधुनिक सुविधा पुरविण्यावर भर दिला आहे. नवी मुंबईच्या विकासाकरिता सिडको महामंडळाने करावे गावातील व परिसरातील स्थानिक शेतकऱ्यांच्या जमिनी संपादित केल्या आणि योग्य शिक्षणाच्या संधी उपलब्ध करून शहरात मराठी, हिंदी, इंग्रजी, उर्दू माध्यमासह सीबीएसई शाळा सुरू केली.
दरम्यान, पालिकेच्या सीबीएसई शाळांमध्ये प्रवेश घेण्यासाठी नागरिक उत्सुक आहेत; मात्र या शाळांमध्ये ऑनलाइन पद्धतीने प्रवेश प्रक्रिया राबवून प्रवेश दिला जातो. ही बाब लक्षात घेऊन करावेगाव ग्रामस्थ सुधार समिती यांच्या वतीने प्रकल्‍पग्रस्‍तांच्या पाल्यांसाठी २५ टक्के आरक्षण ठेवण्याचे पत्र पालिका आयुक्त डॉ. कैलास शिंदे यांना देण्यात आले आहे. आमच्या पाल्यांना योग्य शिक्षणाची संधी पालिकेने उपलब्ध करून दिली आहे; परंतु त्यामध्ये बिगर स्थानिकांना जास्त प्राधान्य दिले जात आहे. ही बाब लक्षात घेता प्रकल्पग्रस्तांच्या पाल्यांना प्रवेश प्रक्रियेत समाविष्ट करून आरक्षण मिळावे, जेणेकरून स्थानिक शेतकऱ्यांचे अस्तित्व राहील व त्यांच्या शिक्षणाचा मार्ग सुखकर होईल, असे करावेगाव सुधार समितीचे अध्यक्ष योगेश तांडेल यांनी या वेळी सांगितले.