शिक्षकांवर संघर्षाची वेळ आणू नका
शरद पवार यांचे सरकारला आवाहन

मुंबई, ता. ९ ः राज्यातील शाळांमध्ये ज्यांच्यावर ज्ञानदानाची जबाबदारी आहे आणि उद्याची महाराष्ट्राची पिढी तयार करायची नैतिक जबाबदारी ज्यांनी अंत:करणापासून स्वीकारलेली आहे, त्यांच्यावर संघर्ष करण्याची वेळ आणू नका, असे आवाहन राष्ट्रवादी काँग्रेसचे (शरद पवार) अध्यक्ष शरद पवार यांनी आज आझाद मैदानात केले. नवी पिढी घडवणाऱ्या शिक्षकांवर चिखलात बसण्याची वेळ येणे हे महाराष्ट्राला शोभणार नसल्याचे त्यांनी सरकारला ठणकावून सांगितले.
आझाद मैदानावर मागील दोन दिवसांपासून सुरू असलेल्या विनाअनुदानित आणि अंशतः अनुदानित शाळांतील शिक्षकांच्या आंदोलनाला पवार यांनी भेट देऊन आंदोलकांशी संवाद साधला. सरकारने त्यांच्या प्रश्नावर तातडीने निर्णय घेण्याची मागणी केली. या वेळी शिवसेना ठाकरे गटाचे प्रमुख उद्धव ठाकरे यांनीही आझाद मैदानात येऊन आंदोलक शिक्षकांना आपला पाठिंबा दर्शविला. या वेळी खासदार नीलेश लंके यांच्यासह अनेक लोकप्रतिनिधींनी आंदोलकांना पाठिंबा दर्शविला. या वेळी पवार म्हणाले, ‘‘२४ ऑक्टोबरची जी ऑर्डर काढली त्यासाठी हजार-बाराशे कोटी लागतील. त्याची तरतूद करा आणि पैसे द्यायला सुरुवात करा. राज्यामध्ये शिक्षकांचा सन्मानच होतो, असा इतिहास घडवा. महाराष्ट्राची विधानसभा, महाराष्ट्राची विधान परिषद, देशाची लोकसभा आणि देशाची राज्यसभा या सगळ्या संस्थांमध्ये गेली ५६ वर्षे मी सतत आहे आणि त्यामुळे या प्रशासनाच्या संबंधी तुम्ही काही चिंता करू नका. कसा निर्णय घ्यायचा असतो, कशी तरतूद आणायची असते आणि तुम्हाला ती कशी द्यायची असते, हे मला कुणी शिकवायची गरज नाही. मागणी पदरात पडेल यासाठी आमचा आग्रह राहणार आहे.’’
...
विधानमंडळात आवाज उठवू!
शिवसेना ठाकरे गटाचे प्रमुख उद्धव ठाकरे यांनीही आझाद मैदानात येऊन शिक्षकांना जाहीर पाठिंबा दिला. ‘महाराष्ट्रात दिल्लीच्या गुलामांचे सरकार बसलेले आहे, ते मराठी शिक्षकांना त्यांच्या आंदोलनाला चिरडून टाकण्याचा प्रयत्न करीत आहे. आम्ही तुम्हाला तुमच्या मागण्यांबाबत होकार दिला होता. हे सरकार होकार देत नाही. हे सरकार तुमच्याशी फसवणूक करीत आहे,’ असे सांगत ‘आम्ही विधानमंडळात आवाज उठवू,’ असे आश्वासन या वेळी ठाकरे यांनी आंदोलकांना दिले.