‘शिवशाही’प्रकरणी पाच जणांवर कारवाई

ठाणे शहर, ता. ९ (बातमीदार) : राज्य मार्ग परिवहन महामंडळाच्या ठाणे-कोल्हापूर शिवशाही बसच्‍या अस्वच्छता प्रकरणात पाच जणांवर कारवाई करण्यात आली आहे. यामध्ये वाहन परीक्षकाचे निलंबन करण्यात आले असून, चार यांत्रिकी कर्मचाऱ्यांवर नियमित आरोपपत्र दाखल करण्यात आले आहे. या पाच जणांच्या उपस्थितीत ठाणे आगार क्रमांक २ मधून संंबंधित शिवसाही बस तपासणी न करताच प्रवाशांच्या सेवेसाठी बाहेर काढण्यात आली. या बसमधील अस्वच्छता आणि दुरवस्थेचे चित्रीकरण एका प्रवासी महिलेने व्हायरल केले होते. त्यावर ठाणे एसटी विभागाने चौकशी करून ही कारवाई केली.

ठाणे आगर क्रमांक २ (खोपट) मधून ठाणे कोल्हापूर ही शिवशाही वातानुकूलित बस नियोजित सेवेत असते. ही बस शुक्रवारी (ता. ४) सकाळी ६ वाजण्याच्या सुमारास कोल्हापूरकडे रवाना करण्यात आली होती, मात्र बसची स्वछतेची तपासणी न करता ती प्रवाशांकरिता आगाराबाहेर काढण्यात आली. या बसची परिस्थिती पाहता एका महिला प्रवाशाने बसचे मोबाईलमध्ये चित्रीकरण करून ते सोशल मीडियावर व्हायरल केले होते. यामध्ये महिला प्रवाशाने महामंडळाच्या कारभाराबाबत संताप व्यक्त केला होता. या घटनेची प्रसारमाध्यमांनीदेखील दखल घेतली होती. ‘सकाळ’नेदेखील एसटीचे कार्यशाळाप्रमुख विवेक लोंढे यांच्याकडे बसच्या परिस्थितीबाबत विचारणा केली असता ‘चौकशी करून संबंधितांवर कारवाई केली जाईल, असे त्यांच्याकडून सांगण्यात आले होते. त्यानंतर ठाणे विभाग वाहतूक नियंत्रक सागर पळसुले यांनी कोल्हापूरला गेलेली ही बस तातडीने माघारी बोलावली होती. याप्रकरणी पाच जणांवर कारवाई केली असून, संबंधित बसची कार्यशाळेत किरकोळ कामांची दुरुस्ती केली जात असल्याची माहिती आगार व्यवस्थापक राहुल बोरसे यांनी दिली.