काळू नदीवरील बंधारा धोकादायक
टिटवाळा, ता. १० (वार्ताहर) : शहरातील काळू नदीवर असलेला एकमेव बंधारा सध्या अत्यंत धोकादायक अवस्थेत आहे. पावसाळ्याच्या सुरुवातीलाच या बंधाऱ्याचे पिलर पाण्याच्या प्रचंड प्रवाहात वाहून गेले आहेत. त्यामुळे संपूर्ण बंधारा कोसळण्याचा मोठा धोका निर्माण झाला आहे. तसेच मांडा-टिटवाळा परिसरात पाणीपुरवठा खंडित होण्याची व पूरजन्य परिस्थिती निर्माण होण्याची भीती वर्तवण्यात येत आहे. यामुळे स्थानिक नागरिकांमध्ये भीतीचे वातावरण पसरले आहे.

बंधाऱ्याद्वारे पूर्व व पश्चिम टिटवाळा भागातील नागरिकांना वर्षभर पाणीपुरवठा केला जातो; मात्र गेल्या अनेक वर्षांत या बंधाऱ्याच्या दगडी संरचनेची कोणतीही स्थायी दुरुस्ती करण्यात आलेली नाही. त्यामुळे बंधारा दिवसेंदिवस अधिकच जीर्ण होत आहे. हलक्या पावसातही त्याचे अस्तित्व धोक्यात येत असल्याचे चित्र आहे. स्थानिक माजी नगरसेवक संतोष तरे यांनी यापूर्वी वेळोवेळी महापालिकेच्या पाणीपुरवठा विभागाला पत्रव्यवहार करून बंधाऱ्याच्या दुरुस्ती व उंचीकरणाची मागणी केली होती, परंतु प्रशासनाने या मागण्यांकडे दुर्लक्ष करत केवळ तात्पुरत्या उपाययोजनांवर समाधान मानले आहे. परिणामी संपूर्ण टिटवाळा परिसर संभाव्य आपत्तीच्या उंबरठ्यावर उभा आहे.

सध्या पावसाळ्याचा जोर दिवसेंदिवस वाढत असून, बंधाऱ्याचे उर्वरित भागही वाहून जाण्याची भीती व्यक्त केली जात आहे. अशा वेळी जर बंधारा पूर्णतः कोसळला, तर हजारो नागरिकांना पाणीटंचाईचा सामना करावा लागेल. तसेच परिसरात पूरस्थिती निर्माण होऊ शकते. या पार्श्वभूमीवर माजी नगरसेवक संतोष तरे यांनी प्रशासनाला तातडीने घटनास्थळी भेट देऊन बंधाऱ्याची पाहणी करावी, तसेच नव्याने बंधाऱ्याचे उंचीकरण व मजबुतीकरण करावे, असे आवाहन केले आहे. स्थानिक नागरिकांनीही जोरदार व्यक्त करत पालिकेने यावर तत्काळ कारवाई करावी, अशी मागणी केली आहे. प्रशासनाकडून वेळेवर पावले उचलली नाहीत, तर ही निष्काळजी भविष्यात मोठ्या आपत्तीचे कारण ठरू शकतो.