पालिका शाळेतील
९५४ विद्यार्थी
गुणवत्ता यादीत
सकाळ वृत्तसेवा
मुंबई, ता. १० ः पूर्व उच्च प्राथमिक शिष्यवृत्ती परीक्षेत मुंबई महानगरपालिका शिक्षण विभागातील इयत्ता पाचवीच्या ५३६ आणि इयत्ता आठवीच्या ४१८ अशा एकूण ९५४ विद्यार्थ्यांनी जिल्हा गुणवत्ता यादीत स्थान मिळविले आहे. या विद्यार्थ्यांना पुढील शिक्षणासाठी दरमहा शिष्यवृत्ती मिळणार आहे, अशी माहिती पालिकेच्या शिक्षण विभागाने दिली.

महाराष्ट्र राज्य परीक्षा परिषद (पुणे) यांच्या वतीने पूर्व उच्च प्राथमिक शिष्यवृत्ती परीक्षा घेण्यात येते. यंदा ९ फेब्रुवारीला संपूर्ण महाराष्ट्रात एकाच वेळी ही परीक्षा घेण्यात आली होती. दरवर्षी या परीक्षेत पालिकेचे हजारो विद्यार्थी सहभागी होतात. विद्यार्थ्यांचा जास्तीत जास्त सहभाग वाढावा, तसेच निकालात वृद्धी व्हावी, यासाठी महापालिकेचा शिक्षण विभाग विविध उपक्रम राबवत आहे. गत तीन वर्षांपासून शिष्यवृत्ती परीक्षेत बृहन्मुंबई महापालिका शाळांतील विद्यार्थ्यांचा यशाचा आलेख उंचावत आहे. 

यंदा २०२५ मध्ये शिष्यवृत्ती परीक्षेत इयत्ता पाचवीतून ५३६ विद्यार्थ्यांना तर इयत्ता आठवीतून ४१८ विद्यार्थ्यांना असे एकूण ९५४ विद्यार्थ्यांना शिष्यवृत्ती मिळाली आहे. गतवर्षी (२०२४) मध्ये इयत्ता पाचवीच्या ३१७ तर इयत्ता आठवीच्या २८८ असे एकूण ६०५ विद्यार्थ्यांना शिष्यवृत्ती मिळाली होती.
------------