ऑनलाइन सेक्स रॅकेट चालविणारे त्रिकूट जेरबंद
नवी मुंबईतून पाच पीडित महिलांची सुटका
नवी मुंबई, ता. १० (वार्ताहर) : नवी मुंबई परिसरात ऑनलाइन सेक्स रॅकेट चालवणारी टोळी उद्ध्वस्त करण्याची कामगिरी नवी मुंबई पोलिसांच्या अनैतिक मानवी वाहतूक प्रतिबंधक कक्षाने केली आहे. या कारवाईत पोलिसांनी ऑनलाइन सेक्स रॅकेट चालवणाऱ्या दोन दलाल व रिक्षाचालक अशा तिघांना अटक केली आहे. तसेच या दलालांनी वेश्याव्यवसायासाठी नेरूळ येथील एका घरामध्ये ठेवलेल्या पाच पीडित महिलांची सुटका केली आहे. या सेक्स रॅकेटमध्ये सहभागी असलेल्या इतर तीन दलालांचा पोलिस शोध घेत आहेत.
नवी मुंबई परिसरात एका टोळीकडून ऑनलाइन सेक्स रॅकेट चालवण्यात येत असल्याची माहिती अनैतिक मानवी वाहतूक प्रतिबंधक कक्षाला मिळाली होती. त्यानुसार, मंगळवारी (ता. ८) पोलिसांनी बनावट ग्राहकाद्वारे ऑनलाइन सेक्स रॅकेट चालवणाऱ्या टोळीने संपर्कासाठी ठेवलेल्या मोबाईलवर संपर्क साधला असता, त्याला तुर्भे येथील हॉटेल गोल्डन ओकमध्ये रूम बुक करण्यास सांगण्यात आले. बनावट ग्राहकाने हॉटेलमध्ये रूम बुक करून दलालाने व्हॉट्सॲपवर पाठवलेल्या एका महिलेची निवड केल्यानंतर दलालांनी एका महिलेला रिक्षातून वेश्याव्यवसायासाठी पाठवून दिले. त्यानंतर बनावट ग्राहकाने इशारा दिल्यानंतर रात्री ११ वाजण्याच्या सुमारास पोलिसांनी या हॉटेलमध्ये छापा टाकला.
पोलिसांनी या महिलेला ताब्यात घेऊन तिची चौकशी केली असता, तिला राजेशकुमार मुन्ना यादव या ऑनलाइन साईट चालविणाऱ्या व्यक्तीने पाठवल्याचे उघडकीस आले. त्यानंतर पोलिसांनी राजेशकुमार यादव याला वाशीतील जुहूगाव येथून अटक केली. त्यानंतर पोलिसांनी केलेल्या तपासात पीडित महिलांना नेरूळ येथील एका घरामध्ये ठेवण्यात आल्याचे उघडकीस आले. त्या ठिकाणी पोलिसांनी छापा टाकून आणखी दोन महिलांना ताब्यात घेतले. त्या मुलींनी शंभू मुनीलाल उपाध्याय व बॉबी ऊर्फ मकबुल अन्सारी या दलालांशी संबंधित असल्याचे सांगितले. पोलिसांनी महिलांना वेश्याव्यवसायासाठी लॉजवर घेऊन जाणारा रिक्षाचालक मुकेश राय आणि दलाल दिनेश डांगी या दोघांनाही अटक केली. त्यांच्या ताब्यात असलेल्या आणखी दोन पीडित महिलांचीदेखील पोलिसांनी सुटका केली. याप्रकरणी तुर्भे पोलिस ठाण्यात पीटा ॲक्टनुसार गुन्हा दाखल करण्यात आला असून दोन दलाल व एक रिक्षाचालक अशा तिघांना अटक केल्याची माहिती वरिष्ठ पोलिस निरीक्षक पृथ्वीराज घोरपडे यांनी दिली. शंभू मुनीलाल उपाध्याय, बॉबी ऊर्फ मकबुल अन्सारी व धिरू या तीन दलालांचा शोध सुरू असून यातील अटक आरोपींना न्यायालयाने १४ जुलैपर्यंत पोलिस कोठडी ठोठावल्याचेही त्यांनी सांगितले.

वेश्यागमनासाठी चार हजार रुपये
सेक्स रॅकेट चालवणाऱ्या टोळीने संपर्कासाठी ठेवलेला मोबाईल नंबर गुगलवर सर्च केल्यानंतर तो तीन वेगवेगळ्या वेबसाईटवर व्हॉट्सॲप चॅटिंगसाठी वापरला जात होता. त्यानंतर दलाल व्हॉट्सॲपवरून चॅटिंगद्वारे वाशी, नेरूळ, तुर्भे परिसरात लॉज बुक करून ग्राहकांना वेश्याव्यवसायासाठी महिलांची उपलब्धता करून देत होते. तसेच वेश्यागमनासाठी चार हजार रुपये घेऊन त्यातील दोन हजार रुपये महिलांना दिले जात होते. तर उर्वरित रक्कम दलाल आपआपसात वाटून घेत असल्याचे तपासात आढळून आले आहे.