रोहा, ता. १२ (बातमीदार) ः तालुक्यातील तळाघर ग्रामपंचायतीमधील बोरघर गावच्या स्मशानभूमीची दुरवस्था झाली आहे. निवारा शेड नसल्‍याने भर पावसात अंत्यविधी करताना ग्रामस्‍थांची मोठी गैरसोय होते. स्‍मशानभूमीत मोडकळीस आलेल्‍या चार लाकडी खांबांवर नातेवाइकांना अंत्‍यविधी करावे लागत असल्‍याने मृतदेहाची हेळसांड होते. याप्रकरणी संबंधित प्रशासनाने व लोकप्रतिनिधींनी लक्ष किमान सुविधा उपलब्‍ध करून देण्याची मागणी ग्रामस्‍थांकडून करण्यात येत आहे.
बोरघर स्मशानभूमीत निवाराशेडअभावी अंत्यविधीसाठी आलेल्या ग्रामस्‍थांना झाडाझुडपांचा आसरा घ्यावा लागतो. ज्‍या ठिकाणी अंत्‍यविधी केले जातात, ते लोखंडी खांब उभे गंजले असून पडण्याच्या स्‍थितीत आहेत. याठिकाणी बांधलेल्‍या चौथऱ्याचीही पडझड झाली असून ठिकठिकाणी खड्डे पडले आहेत. त्‍यामुळे नागरिकांना लाकडे रोवून त्‍यावर अंत्यविधी करावा लागतो. दोन-तीन वर्षांपासून स्मशानभूमीचा प्रश्न प्रलंबित आहे. याठिकाणी दिवाबत्तीचीही सुविधा नसल्‍याने रात्रीच्या वेळी नागरिकांची गैरसोय होते. त्‍यामुळे लोकप्रतिनिधी व ग्रामपंचायतीने याप्रकरणी लक्ष घालून नवीन स्मशानभूमी बांधून द्यावी, अशी मागणी बोरघरचे कार्यकर्ते गणेश कडव यांनी केली असून ते सातत्‍याने पाठपुरावा करीत आहेत.

वीजपुरवठा करण्याची मागणी
बोरघर स्‍मशानभूमी निवारा शेड, चौथरा नाही, त्‍यामुळे नागरिकांना अडचणींना समोर जावे लागते. रात्रीच्या वेळी अंत्यविधी करण्यासाठी विजेची व्यवस्‍था तळाघर-बोरघर ग्रामपंचायतीने किंवा लोकप्रतिनिधी यांनी करून घ्यावी. त्याचबरोबर परिसरातील स्वच्छता, देखभालीसाठी निधी मंजूर करावा, अशी मागणी बोरघरमधील ग्रामस्‍थ निखिल वाळंज यांनी केली आहे.

निधीअभावी कामास विलंब
बोरघर स्मशानभूमीत काम करण्यासाठी ग्रामपंचायतीकडे पुरेसा निधी उपलब्ध नाही; परंतु जिल्हा नियोजन मंडळ किंवा आमदार फंडातून निधी उपलब्ध झाला तर निश्चित त्या ठिकाणी काम करू, अशी माहिती तळाघर ग्रामपंचायतीच्या ग्रामसेविका अर्चना पाटील यांनी दिली.

रोहा ः स्‍मशानभूमीमध्ये सुविधांची वानवा आहे.