भिवंडी, ता. १२ (वार्ताहर) : महिलांसह अल्पवयीन मुलींवरील अत्याचाराच्या घटना वाढत असताना भिवंडीत रिक्षाचालकाने साथीदाराच्या मदतीने शाळकरी विद्यार्थिनीच्या अपहरणाचा प्रयत्न केला. या वेळी मुलीने धाडसाने रिक्षाचालकावर हल्ला चढवून स्वतःची सुटका करून घेतली.
शहरातील फातिमानगर परिसरात राहणारी १६ वर्षीय विद्यार्थिनी बुधवारी (ता. ९) दुपारी १२ वाजता शाळेत जाण्यासाठी रिक्षाने निघाली होती. तिची रिक्षा रामनगर येथील पाण्याच्या टाकीजवळील शाळेजवळ आली असता तिने रिक्षा थांबवण्यास सांगितली. मात्र, चालकाने रिक्षा न थांबवता तिला पळवून नेण्याचा प्रयत्न केला. त्यावेळी प्रसंगावधान राखत विद्यार्थिनीने स्कूल बॅगमधील कंपास पेटीमध्ये असलेले कर्कटकने रिक्षाचालकावर हल्ला केला. शेजारी बसलेल्या त्याच्या साथीदाराला धक्का मारून रिक्षातून उडी मारत सुटका करून घेतली. घरी आल्यावर तिने घडलेला सर्व प्रसंग आई-वडिलांना सांगितला. त्यानंतर शुक्रवारी विद्यार्थिनीच्या तक्रारीनंतर अज्ञात रिक्षाचालक व त्याचा साथीदार अशा दोघांविरोधात गुन्हा दाखल करण्यात आला आहे. पोलिस विद्यार्थिनीने दिलेल्या वर्णनावरून रिक्षाचालकाचा शोध घेत आहेत.