भिवंडी, ता. १३ (बातमीदार) : भिवंडीतील पद्मानगर येथील स्वामी विवेकानंद हिंदी हायस्कूलमध्ये शहरातील स्त्रीरोगतज्ज्ञ डॉ. सुप्रिया अरवारी यांनी विद्यार्थिनींना आणि त्यांच्या मातांना किशोरवयीन आरोग्य उपक्रमांबद्दल माहिती देत जागरूकता केली. या उपक्रमासाठी शाळेतील ७०० महिला आणि विद्यार्थिनींनी सहभाग घेतला. त्यामध्ये सहावी ते नववीपर्यंतच्या ४०० विद्यार्थिनी, ३०० माता आणि शाळेतील कर्मचारी होते.
भिवंडी शहरात मोठ्या संख्येने कामगार वस्ती आहे. त्यांच्या आरोग्याविषयी माहिती देणारे सत्र आयोजित करणे अपेक्षित असताना शाळेने उपक्रम राबविल्याने उपस्थित लोकांनी या कार्यक्रमाचे कौतुक केले. कार्यक्रमात किशोरवयीन मुलींच्या आरोग्याशी संबंधित विषयांवर, जसे की यौवनावस्थेतील शरीररचना आणि शरीरक्रिया विज्ञान, मासिक पाळीचे आरोग्य आणि स्वच्छता, पीसीओएस, लैंगिक शोषण, पदार्थांचे सेवन, चांगला-वाईट स्पर्श आदी विषयांवर सविस्तर चर्चा करण्यात आली. या वेळी डॉ. सुप्रिया अरवारी यांनी निरोगी आहार, व्यायाम आणि वैयक्तिक स्वच्छतेचे महत्त्व अधोरेखित केले. उपस्थित विद्यार्थ्यांनी आणि इतरांनी प्रश्न आणि टिप्पण्या देऊन संवाद साधले.
याप्रसंगी डॉ. अरावरी यांनी डॉ. सत्यम आणि सुवर्णा पेम्बटला आणि विवेकानंद स्कूलच्या व्यवस्थापनाचे विशेष आभार मानले. काळाच्या मागणीनुसार आणि समाजातील वाढत्या शोषणाबद्दल लोकांना जागरूक करण्यासाठी, शहरातील विविध ठिकाणी असे जागरूकता कार्यक्रम होत आहे. त्यामुळे येणारी पिढी स्वतःचे संरक्षण करू शकेल, असे त्या म्हणाल्या.