प्रकल्पग्रस्त ठेकेदार, सफाई कामगारांची विठू चरणी स्वच्छता मोहीम
तुर्भे, ता. १२ (बातमीदार) : आषाढी एकादशीनिमित्त लाखो भाविकांची मांदियाळी जमलेल्या पंढरपूरमध्ये नवी मुंबई महापालिकेच्या प्रकल्पग्रस्त ठेकेदारांच्या माध्यमातून यंदादेखील स्वच्छता अभियान राबविले. आषाढी यात्रेच्या दुसऱ्या दिवशी या सर्व मंडळींनी सुमारे दोन टन कचरा पंढरपुरातून जमा करून त्याची विल्हेवाट लावली. तीन दिवस या ठिकाणी स्वच्छता मोहीम राबवली गेली. यंदाचे हे चौथे वर्ष असून, मागील २८ वर्षांपासून प्रकल्पग्रस्त सफाई ठेकेदारांकडून कार्ला गड, जेजुरी गड या ठिकाणीदेखील स्वच्छता मोहीम राबवली जाते.
सामाजिक भान ठेवत तसेच कुठल्याही प्रकारच्या वा कुणाच्या मदतीची अपेक्षा न ठेवता प्रकल्पग्रस्त ठेकेदार व सफाई कामगारांनी स्वच्छतेचे काम केले. शुक्रवार (ता. ११) व शनिवार (ता. १२) या दोन दिवशी पंढरपूर नगरीत स्वच्छता अभियान राबविण्यात आले. तर रविवारी (ता. १३) जेजुरी गडावर स्वच्छता मोहीम राबवली जाणार आहे. स्वच्छता मोहिमेसाठी विविध पथके नेमण्यात आली होती. यामध्ये प्लास्टिक पिशव्यांचा खच, द्रोण, ग्लास, केळीच्या साली, कुजलेले अन्न, तुटक्या चपला, पिशव्या, चंद्रभागेतील कठडे स्वच्छ करण्यात आले.
विठ्ठल-रखुमाई चरणी स्वच्छता मोहिमेसाठी कोपरखैरणे विभागातील प्रकल्पग्रस्त ठेकेदारांच्या नेतृत्वाखाली कोपरखैरणे विभागातील साफसफाई ठेकेदार राजू मढवी, कुलदीप आगास्कर, वासुदेव म्हात्रे, विजय म्हात्रे, वैजयंती पाटील, रवींद्र मढवी, रमेश पाटील, भावेश पाटील, नारायण डाउरकर, एन. एस. भगत, राजूसिंग चव्हाण, जयदास पालकर, विनेश म्हात्रे, गणेश ठाकूर, नितीन पाटील, दत्ता मढवी, सुशांत गोगावले, सूर्यकांत मढवी आणि सर्व कामगारवर्ग यांच्या सहकार्याने ही स्वच्छता मोहीम राबविण्यात आली.