आदिवासी पाड्यावरील विद्यार्थ्यांना शालेय साहित्य वाटप
तुर्भे, ता. १३ (बातमीदार) ः भजनयात्री हंसारामबुवा नेरूळकर यांच्या पुण्यस्मरणाचे औचित्य साधून स्वरसंगम सांस्कृतिक संस्थेच्या विद्यमाने व ज्येष्ठ साहित्यिक, सामाजिक कार्यकर्ते अमृत पाटील नेरूळकर यांच्या विशेष पुढाकाराने फणसवाडी, खारघर या आदिवासी पाड्यावरील विद्यार्थ्यांना शालेय साहित्य, छत्र्या, लेझीम, खेळाचे साहित्य व खाऊ वाटपाच्या कार्यक्रमाचे आयोजन करण्यात आले होते. याप्रसंगी सामाजिक कार्यकर्ते, संशोधक प्रा. डॉ. हरिश्चंद्र सिंह जयपूरकर प्रमुख पाहुणे उपस्थित होते.
आदिवासी बांधवाचे पर्यावरण संरक्षण व संवर्धन क्षेत्रातील योगदान विशेष उल्लेखनीय आहे. विशेषतः ग्रामसंस्कृती, लोककला, लोकपरंपरा जपणारा हा समाजबांधव निसर्गातील वाघ, नाग, गज, वड, पिंपळ, चंद्र, सूर्य यांना देवता म्हणून अगदी मनोभावे पूजतो. यावरून तो खऱ्या अर्थाने निसर्गपूजक असल्याचे सिद्ध होते, असे मत हरिश्चंद्र सिंह जयपूरकर यांनी व्यक्त केले.
व्यासपीठावर ज्येष्ठ सामाजिक कार्यकर्ते मदन घेघाटे (अकोला), रवीभाऊ मडावी (यवतमाळ), युगंधरा ठाकूर (नेरूळ), मंगेश डुबे (चंद्रपूर), शेळके आदी मान्यवर उपस्थित होते. कार्यक्रमाचे सूत्रसंचालन मंगेश डुबे यांनी केले. कार्यक्रम यशस्वी करण्यासाठी रामचंद्र म्हात्रे, पद्माकर वैती, आदिती पाटील, अथर्व पाटील यांनी विशेष मेहनत घेतली.