नागरी समस्यांविरोधात मनसेचे शिट्टी आंदोलन
नवी मुंबई, ता. १३ ः नेरूळ आणि जुईनगर परिसरातील विविध समस्यांचे निवारण करण्यासाठी मनसेतर्फे महापालिकेच्या नेरूळ येथील विभाग कार्यालयावर शिट्टी वाजवा मोर्चाचे आयोजन करण्यात आले होते. मनसे प्रवक्ते गजानन काळे यांच्या नेतृत्वाखाली हा भव्य ‘शिट्टी मोर्चा’ काढला. या मोर्चात मोठ्या प्रमाणात नागरिक आणि मनसे पदाधिकारी सहभागी झाले होते.
मागील पाच वर्षांपासून महापालिकेवर प्रशासकाचा कारभार आहे. या काळात सगळीकडे आरोग्य, अपुरा पाणीपुरवठा, खराब रस्ते-पदपथ, करोडो रुपये खर्च करून बंद पडलेल्या वास्तू अशा शेकडो समस्यांनी विभाग वेढलेला आहे. या समस्यांविरोधात मोठ्या प्रमाणात झोपेचे सोंग घेतलेल्या अधिकाऱ्यांना शिट्टी वाजवून महाराष्ट्र सैनिकांनी जागे करण्याचा प्रयत्न केला. शेकडोंच्या संख्येने स्थानिक नागरिक, महिला, मनसे पदाधिकारी, महाराष्ट्र सैनिक मोठ्या प्रमाणात उपस्थित होते. नेरूळ, सेक्टर-२ राजीव गांधी पूल ते कुकशेत गाव, नेरूळ विभाग कार्यालय असा शिट्टी मोर्चा काढण्यात आला. जुईनगरमधील क्रीडा संकुलाचा वापर क्रीडा सोडून इतर बाबींसाठी होतो. नेरूळ पूर्व एलपीच्या पुढे रमेश मेटल येथील झोपडपट्टीमधील नागरिकांना पाणी समस्या आहे. जुईनगर, नेरूळ परिसरात दूषित पाण्यामुळे नागरिक, लहान मुले आजारी पडत आहेत. सगळीकडे निकृष्ट दर्जाचे रस्त्याचे डांबरीकरण आणि सिमेंट काँक्रीटीकरण केले जात आहे. याचा निषेध करण्यासाठी मनसेकडून शिट्टी मोर्चा काढण्यात आला होता. याप्रसंगी मनसेचे सविनय म्हात्रे, अभिजित देसाई यांच्यासहित मनसेचे शेकडो पदाधिकारी उपस्थित होते.