परीक्षण अहवालाची प्रतीक्षा

वांद्रे येथील मॉलबाबत सोसायटीचे प्रतिज्ञापत्र

सकाळ वृत्तसेवा
मुंबई, ता. १३ : वांद्रे येथील लिंक स्क्वेअर मॉलमध्ये एप्रिलमध्ये लागलेल्या भीषण आगीच्या पार्श्वभूमीवर इमारतीचे स्ट्रक्चरल ऑडिट पूर्ण झाले आहे. त्याच्या अंतिम अहवालाची अद्याप प्रतीक्षा आहे, अशी माहिती प्रीमिसेस को-ऑपरेटिव्ह सोसायटी लिमिटेडने नुकतेच प्रतिज्ञापत्राद्वारे उच्च न्यायालयाला दिली आहे.

२९ एप्रिलला माजी आमदार झीशान सिद्दीकी यांच्या मालकीच्या या मॉलच्या तळघरातील क्रोमा शोरूमला स्तर-४ दर्जाची आग लागली होती. या आगीत कोणतीही जीवितहानी झाली नसली तरी दोन टेरेस रेस्टॉरंटसह दोनशेहून अधिक दुकाने जळून खाक झाली होती. ही आग विझवण्यासाठी मुंबई अग्निशमन दलाला तब्बल २२ तास झुंज द्यावी लागली होती. चायना गेट ग्रुपचे टीएपी रेस्टो बार, ग्लोबल फ्यूजन यांसह अन्य रेस्टॉरंटचे मोठे आर्थिक नुकसान झाले होते.
यासंदर्भात चायनागेट रेस्टॉरंट्स प्रायव्हेट लिमिटेडने उच्च न्यायालयात धाव घेऊन आगीनंतर परिसरातील कचरा हटवणे आणि इमारतीचे स्ट्रक्चरल ऑडिट करण्याच्या सूचना देण्याची मागणी केली होती. न्यायमूर्ती गिरीश कुलकर्णी आणि न्यायमूर्ती आरिफ डॉक्टर यांच्या खंडपीठासमोर यावर सुनावणी झाली.

सोसायटीने प्रतिज्ञापत्रात स्पष्ट केले की, २० जूनला महिमतुरा कन्सल्टंट्स प्रायव्हेट लिमिटेड यांची ऑडिटसाठी नियुक्ती करण्यात आली होती. त्यांच्यामार्फत केलेल्या परीक्षणाचा अंतिम अहवाल येणे बाकी आहे. तसेच सरदार पटेल कॉलेज ऑफ इंजिनिअरिंगमार्फत सुरू असलेल्या स्वतंत्र ऑडिटविषयी कोणताही आक्षेप नसल्याचे त्यांनी न्यायालयात स्पष्ट केले. याचिकाकर्त्यांनी ३ जुलैला ऑडिटची मागणी केली होती, ती दुसऱ्याच दिवशी मान्य करण्यात आली होती, असेही प्रतिज्ञापत्रात नमूद आहे.
-----------------------------------
जागेच्या तपासणीचे निर्देश
उच्च न्यायालयाने पालिका आणि अग्निशमन विभागाने जागेची तपासणी करून आवश्यक परवानग्या द्याव्यात, असे स्पष्ट आदेश दिले आहेत. सोसायटीने दोन्ही ऑडिट संस्थांबाबत कोणताही आक्षेप नसल्याचे न्यायालयात स्पष्ट केले आहे. या अहवालावर आणि प्रशासनाच्या पुढील पावलांवर मॉलच्या पुनर्बांधणीचे भवितव्य ठरणार आहे.