किरकोळ भांडणातून तरुणाचा खून; दोघांना अटक
सकाळ वृत्तसेवा
ठाणे, ता. १३ : किरकोळ झालेल्या भांडणातून एका दुकलीने सचिन पुजारी नामक तरुणाला बेदम मारहाण केली होती. त्यांना ठाणे महापालिकेच्या छत्रपती शिवाजी महाराज रुग्णालयात दाखल केले असताना, उपचारादरम्यान त्यांचा मृत्यू झाला. याप्रकरणी राहुल शिंदे आणि सीताराम जाधव या दोघांना मुंब्रा पोलिसांनी अवघ्या दोन तासांच्या आत ताब्यात घेतले.
मुंब्रा रेल्वेस्थानकासमोर उड्डाणपुलाखाली तात्पुरत्या स्वरूपात राहणाऱ्या दोन परिवारामध्ये घरातील वस्तू फेकल्याने ११ जुलै रोजी सचिन पुजारी यांना जीवे ठार मारण्याच्या उद्देशाने मारहाण करण्यात आली. उपचारादरम्यान पुजारी यांचा मृत्यू झाला. याप्रकरणी पुजारी यांची पत्नी सविता पुजारी यांच्या तक्रारीनुसार खुनाचा गुन्हा दाखल करण्यात आला होता. मुंब्रा पोलिसांनी सीसीटीव्ही फुटेज व तांत्रिक तपासाच्या आधारे दोन तासांच्या आत मारेकऱ्यांना ताब्यात घेतले. याप्रकरणी पुढील तपास सुरू आहे.