आमदारासाठी म्हाडाचे
साडेनऊ लाखांत घर!

कोकण मंडळाच्या लॉटरीत ९५ राखीव घरे

बापू सुळे : सकाळ वृत्तसेवा
मुंबई, ता. १४ : राज्यातील आमदार, खासदारांसाठी राखीव असलेल्या म्हाडाच्या घराची किंमत अवघी साडेनऊ लाख रुपये आहे. म्हाडाच्या कोकण मंडळाने पाच हजारांहून अधिक घरांची लॉटरी जाहीर केली आहे. त्यात नियमानुसार वेगवगेळ्या राखीव गटांप्रमाणेच आमदार, खासदारांसाठी ९५ राखीव घरे ठेवली आहेत. त्यात कल्याणमधील एका घराचा समावेश असून, त्याची किंमत केवळ नऊ लाख ५५ हजार ८०० रुपये एवढी आहे. हे अत्यल्प उत्पन्न गटातील घर आजी-माजी आमदार-खासदारांसाठी राखीव आहे. त्यामुळे अत्यल्प उत्पन्न गटातील आमदार-खासदार कोण, या घरासाठी कोण अर्ज करणार, कोण विजेता ठरणार याकडे सर्वांचे लक्ष लागले आहे.

म्हाडाच्या कोकण मंडळाने पाच हजार २८५ घरांच्या विक्रीसाठी लॉटरी जाहीर केली आहे. अत्यल्प, अल्प आणि मध्यम उत्पन्न गटातील लोकांसाठी ही घरे असून, त्याच्या किमती साडेनऊ लाखांपासून ५२ लाखांपर्यंत आहेत. यात ११ ठिकाणी अत्यल्प, अल्प उत्पन्न गटातील ९५ घरे राखीव आहेत; मात्र लाखो रुपयांच्या महागड्या गाड्यांनी फिरताना दिसणारे कोण आमदार-खासदार ही घरे घेणार, असा सवाल सामान्यांना पडला आहे. याबाबत म्हाडाकडे विचारणा केली असता महाराष्ट्र गृहनिर्माण आणि क्षेत्र विकास अधिनियम १९७६नुसार उत्पन्न गटानुसार आमदार-खासदारांसाठी घरे राखीव ठेवावी लागतात. या घरांसाठी आमदार-खासदारांकडून अर्ज न आल्यास ती खुल्या वर्गातील अर्जदारांना उपलब्ध होतात, असे म्हाडाच्या एका वरिष्ठ अधिकाऱ्याने सांगितले.
---------
कुठे आहेत राखीव घरे?
ठिकाण - उत्पन्न गट - किंमत (लाखांत) - घरांची संख्या
कल्याण - अत्यल्प - ९.५५ ते ११.३२ - १
टिटवाळा - अल्प - १७.१८ ते ३०.५६ - १
नवी मुंबई - अत्यल्प - ८.५९ - २
कल्याण - अत्यल्प - १९.६० ते १९.९५ - १
विरार - अत्यल्प - १३.२९ - १
ठाणे - अल्प - २० ते २१ - १
वसई - अल्प - १४ ते १८ - १
कल्याण - अल्प - २१-२२ - ४९
शिरढोण - अल्प - ३५.६६ - ११
------
आमदाराचे वेतन किती?
एका आमदाराला सध्या मूळ वेतन १ लाख ८२ हजार २०० रुपये आहे. तसेच मूळ वेतनाच्या २८ टक्के महागाई भत्ता दिला जातो. म्हणजेच जवळपास ५२ हजार १६ रुपये महागाई भत्ता दिला जातो. त्यानुसार दोन लाख ६१ हजार २१६ रुपये वेतन होते.
-----------------