मद्याचे दुकान फोडून १७ लाखांचा मुद्देमाल चोरीला
नवी मुंबई, ता. १४ (वार्ताहर) : घरफोड्या करणाऱ्या चोरट्यांनी शुक्रवारी (ता. ११) पहाटेच्या सुमारास वाशी गाव येथील ‘व्ही फाय लिव्हिंग लिक्विड्स’ हे मद्य विक्रीचे दुकान फोडून त्यातील तब्बल १७ लाख रुपये किमतीच्या विदेशी मद्याच्या बाटल्या चोरून नेल्या. वाशी पोलिसांनी या प्रकरणी गुन्हा दाखल करून चोरट्यांचा शोध सुरू केला आहे.

वाशी गाव येथील सिद्धिविनायक इमारतीमध्ये व्ही फाय लिव्हिंग लिक्विड्स नावाचे मद्य विक्रीचे दुकान आहे. शुक्रवारी पहाटेच्या सुमारास चोरट्यांनी या दुकानाचे शटर उचकटून दुकानातील २० हजारांची रोख रक्कम तसेच विदेशी मद्याच्या बाटल्या असा तब्बल १७ लाख ५८ हजार रुपये किमतीचा ऐवज चोरून नेला. सकाळी ९ वाजता कर्मचारी दुकानाजवळ आले असताना त्यांना हा प्रकार निदर्शनास आला. नंतर त्याने दुकानमालकाला याबाबतची माहिती दिली. या रविवारी (ता. १३) वाशी पोलिस ठाण्यात याबाबत तक्रार दाखल करण्यात आली आहे. या सीसीटीव्ही फुटेजच्या माध्यमातून चोरट्यांचा शोध घेतला जात आहे.