अल्पवयीन मुलांवर अत्याचार करणारा जेरबंद

कल्याण, ता. १४ (बातमीदार) : अल्पवयीन मुलांवर लैंगिक अत्याचार करणाऱ्या विकृताला कल्याण रेल्वे पोलिसांनी बेड्या ठोकल्या आहेत. अरुण उथप्पा असे या आरोपीचे नाव असून, तो आता वडाळा रेल्वे पोलिसांच्या ताब्यात आहे. अत्याचाराला बळी पडलेली दोन्ही मुले वडाळा येथील राहणारी असून, अनेक महिन्यांपासून अरुण त्यांच्यावर लैंगिक अत्याचार करीत असल्याचे चौकशीत आढळून आले आहे.
अत्याचार करण्यासाठी अरुणने दोघांना कल्याणमध्ये आणले होते. रेल्वेस्थानकात गस्तीवर असलेल्या रेल्वे पोलिसांना तिघांवर संशय आला. त्यांनी तिघांना हटकले. त्यानंतर तिघांनाही ताब्यात घेत अधिक चौकशी करून झाडाझडती घेतली असता, दोन्ही मुलांजवळ लिपस्टिक आढळून आली. याबाबत मुलांकडे विचारणा केली असता आरोपीकडून त्यांच्यावर लैंगिक अत्याचार होत असल्याची धक्कादायक बाब उघडकीस आली. कल्याण रेल्वे पोलिसांनी या विकृताविरोधात गुन्हा दाखल करीत त्याला ताब्यात घेऊन हा गुन्हा वडाळा रेल्वे पोलिसांकडे वर्ग केला आहे.