बंद घरात आठ लाखांची चोरी
सकाळ वृत्तसेवा
ठाणे, ता. १५ : लेकीच्या घरी राहण्यासाठी गेलेल्या नौपाड्यातील मराठे दाम्पत्याच्या बंद घरातून सोन्याच्या दागिन्यांसह देवघरातील चांदीचे चार देव, तामन, गडवा आणि रोख रक्कम असा अंदाजे आठ लाखांचा ऐवज घेऊन चोरांनी पोबारा केला. ही घटना रविवारी (ता. १३) रात्री उघडकीस आली. मराठे यांचे पुत्र अतुल मराठे यांनी दिलेल्या तक्रारीनुसार नौपाडा पोलिस ठाण्यात गुन्हा दाखल झाला आहे.
ब्राह्मण सोसायटी येथील गोविंद निवास प्लॉट नं. ३१ येथे शरदचंद्र मराठे (७६) आणि शुभदा मराठे (६९) हे दोघे राहतात. ते दोघे १० ते १२ दिवसांपासून ढोकाळी येथे लेकीकडे राहण्यास गेले होते. तसेच तक्रारदार अतुल मराठे हे मानपाडा येथील दुसऱ्या घरी राहतात. ते पूजापाठाचा व्यवसाय करत असल्याने रविवारी सकाळी नौपाडा येथील घरी थोडा आराम करण्यासाठी आले होते. दुपारी ब्राह्मण सेवा संघ हॉल येथे कामासाठी जाताना घराला लॉक करून गेले होते. तेथील काम संपवून पुन्हा रात्री साडेदहा वाजता आई-वडील राहात असलेल्या घरी गेल्यावर त्या घराचे कुलूप कोयंडा तुटल्याचे निदर्शनास आले. तसेच घरात पाहणी केल्यावर घरात चोरी झाल्याची बाब पुढे आली. या घटनेत चोरट्यांनी कपाटातील सोन्याचे दोन लाख ८० हजारांचे मंगळसूत्र, चार लाख २० हजारांच्या ६० ग्रॅमच्या बांगड्या, ४२ हजारांचे सहा ग्रॅमचे कानातील कुडके, ४२ हजारांचे सहा ग्रॅमचे कानातील झुमके, पाच हजार रुपये किमतीचे चार चांदीचे देव व तांब्याचे तामन आणि गडवा तसेच १० हजारांची रोख रक्कम असा सात लाख ९९ हजार रुपयांचा मुद्देमाल घेऊन पोबारा केला. असे तक्रारीत नमूद केले आहे. याप्रकरणी नौपाडा पोलिस पुढील तपास करत आहेत.