नवी मुंबई दमदार पावसाने जलमय
वाशी, ता. १५ (बातमीदार) : मुसळधार पावसामुळे मंगळवारी ठाणे-बेलापूर मार्गासह, सायन-पनवेल महामार्ग, एमआयडीसीतील रस्ते जलयम झाले होते. त्‍यामुळे सकाळी कामावर जाणाऱ्या नोकरदारांचे हाल झाले. ठिकठिकाणी रस्‍त्‍यावर पाणी साचल्‍याने वाहतुकीचा वेग मंदावला होता, तर काही ठिकाणी वाहने बंद पडण्याच्या घटना घडल्या.
पावसामुळे काळोख पसरल्‍याने भरदिवसा वाहनचालकांना गाडीचे दिवे सुरू करून मार्गक्रमण करावे लागले. पावसाचा जोर वाढल्‍याने पालिकेने काही दिवसांपूर्वी बुजवलेले खड्डे उखडण्यास सुरुवात झाली आहे. नवी मुंबईत मंगळवारी दुपारी साडेतीनपर्यंत सरासरी ४०.८० मिमी पावसाची नोंद झाली. तुर्भे रेल्‍वेस्‍थानकातील भुयारी मार्गात पाणी साचल्‍याने प्रवाशांची गैरसोय झाली.
ठाणे-बेलापूर रस्‍त्‍यावर सखल भागात पाणी साचले होते. तुर्भे उड्डाणपुलाखाली, दिघा येथील थॉमसन प्रेसजवळ, सानपाडा भुयारीमार्ग, एपीएमसी मार्केट, मॅफ्को मार्केट, इंदिरानगर, तुर्भे एमआयडीसी परिसर जलमय झाल्‍याने चालकांना वाहन चालवताना कसरत करावी लागली.
पावसामुळे तीन ठिकाणी झाडे कोसळण्याची घटना घडली. सीबीडी बेलापूर सेक्टर-५ येथे, नेरूळ पाम बीच रस्त्यावर, बेलापूर सेक्टर-९ येथील नर्सरीजवळ, वाशी सेक्टर-२६ येथील टिळक महाविद्यालयाजवळ झाडे कोसळण्याची घटना आपत्कालीन विभागांकडे नोंदवण्यात आली आहे. त्याचप्रमाणे महापे-ठाणे बेलापूर मार्ग तसेच एमआयडीसी समांतर रस्त्यावर पाणी साचले होते, तर कोपरखैरणे सेक्टर-२ मध्ये शॉर्टसर्किट होण्याची घटना घडली.

.................

एपीएमसी बाजारपेठेत पाणी

तुर्भे, ता. १५ (बातमीदार) : सोमवारी रात्रीपासून सुरू असणाऱ्या मुसळधार पावसामुळे वाशीतील कृषी उत्‍पन्न बाजार पाण्याखाली गेला. दरवर्षी कृषी उत्पन्न बाजार समिती (एपीएमसी) घाऊक बाजारात व्यापाऱ्यांना पाणी तुंबण्याच्या समस्‍येला तोंड द्यावे लागते. त्‍यामुळे व्यापारी आणि ग्राहकांना घाणेरड्या पाण्यातून वाट काढावी लागते.
शेती उत्पादनांसाठी आशियातील सर्वात मोठी बाजारपेठ असूनही, पावसाळ्यात या जागेचे व्यावसायिक गाळे पाण्याखाली जातात. व्यापाऱ्यांना गोदामे स्वच्छ ठेवण्यासाठी आणि कचऱ्याच्या ढीग आणि ड्रेनेजच्या पाण्यापासून दूर ठेवण्यासाठी संघर्ष करावा लागतो. एपीएमसी बाजार समितीमधील फळ बाजारातील प्रवेशद्वाराजवळील सखल भाग पावसाच्या पाण्याने भरून जातो. पालिकेने केलेल्या काँक्रीटीकारणामुळे रस्त्याचा भाग उंच झाल्यामुळे पाणी साचत असल्‍याचे व्यापारयांचे म्‍हणणे आहे.
वाशी एपीएमसी मार्केट १७० एकर क्षेत्रात पसरलेले आहे आणि त्यात ३,७०० हून अधिक गोदामे, १,५०० हून अधिक व्यावसायिक दुकाने, मोठी गोदामे आणि पाच मोठी घाऊक बाजारपेठ आहेत. जिथे भाज्या, फळे, धान्य, मसाले आणि कांदा-बटाटे यांचा साठा आहे.
पावसाळ्यापूर्वी नाले सफाई होत नाही. झाली तरी थातूर माथूर केली जाते. पालिका प्रशासनाच्या दुर्लक्षामुळेच बाजारपेठेत पाणी साचत असल्‍याने व्यापारी राम जैस्‍वाल यांनी संताप व्यक्‍त केला.