सीवूड्समध्ये बर्फाचे शिवलिंग दर्शनासह महाप्रसाद सोहळा
नेरूळ (बातमीदार) ः धर्मवीर संभाजीराजे चॅरिटेबल ट्रस्ट, नवी मुंबई यांच्या वतीने श्री अमरनाथ यात्रेनिमित्त विशेष बर्फाचे शिवलिंग दर्शन सोहळा आणि महाप्रसाद कार्यक्रमाचे आयोजन करण्यात आले होते. हा भक्तिमय सोहळा श्री शनेश्वर मंदिर, सेक्टर ४६, सीवूड्स, नवी मुंबई येथे पार पडला. भाविकांसाठी सायंकाळी चार वाजल्यापासून बर्फाचे शिवलिंग दर्शन खुले करण्यात आले. त्यानंतर सायंकाळी साडे सात वाजता महाआरती आणि महाप्रसादाचे वितरण करण्यात आले. हा कार्यक्रम सीवूड्स विभागातील अमरनाथ यात्रेतून परतलेल्या भाविकांच्या वतीने आयोजित करण्यात आला होता. येथील स्थानिक भाविकांना शिवलिंगाचे दर्शन मिळावे आणि प्रसादाचा लाभ घ्यावा, हा उद्देश ठेवून बर्फाचे शिवलिंग तयार करण्यात आले होते. तसेच उत्तर भारतीय नागरिकांचा श्रावण प्रारंभ झाला असून बर्फाचे शिवलिंग पाहण्यासाठी भाविकांची गर्दी झाली होती. हा कार्यक्रम पार पाडण्यासाठी दत्ता घंगाळे, नवनाथ मुंडे, नरेंद्र जुराने, सुधा शंकर नायडू, राजेंद्र जाधव, पंकज पाचपुते, मंदिराचे पुजारी विजय नारियालजी, तसेच सर्व सहकारी, सर्व भक्तगण यांचे सर्वांचे सहकार्य लाभले.
..................
नेरूळमध्ये पाऊसामुळे रस्‍त्‍यांवर खड्डे
जुईनगर, ता. १५ (बातमीदार) : मेपासून सुरू झालेल्या पावसाची राज्यभर जोरदार बॅटिंग सुरू आहे. नवी मुंबईतदेखील पावसाचा जोर कायम आहे. दरम्यान पावसाच्या तडाख्याने अंतर्गत रस्‍त्‍यांवर मोठ्या प्रमाणात खड्डे पडले आहेत. मात्र पालिकेकडून त्‍याकडे दुर्लक्ष केले जात असल्याने नाराजी व्‍यक्‍त केली जात आहे.
नेरूळ पश्चिमेला नेरूळ गाव व सेक्टर १० मधील रस्त्यावर मोठ्या प्रमाणात पावसामुळे खड्डे पडले आहेत. रात्रंदिवस येथील अंतर्गत रस्‍त्‍यावर हजारो वाहनांची वर्दळ असते. गावातील ग्रामस्थांसह सेक्टर ४, ६, १२, १४, १६, १८ परिसरातील नागरिक याचा रस्त्याचा प्रामुख्याने उपयोग करतात. मात्र या मार्गावर खड्डे असल्याने वाहनचालकांची गैरसोय होत आहे. याप्रकरणी तक्रार केल्यावर पालिकेकडून पावसाचे कारण पुढे करण्यात येते. मात्र मध्यंतरी काही दिवस पावसाने विश्रांती घेतल्याने पालिकेला खड्डे बुजवणे शक्‍य होते. मात्र खड्ड्यांकडे पालिकेने दुर्लक्ष केल्याने नागरिकांमधून नाराजी व्‍यक्‍त केली जात आहे. गावातील नागरिकांचा नियमित येण्याचा हा रस्ता आहे. नेरूळ गावच्या प्रवेशद्वारावरच हे खड्डे असल्याने आम्हाला त्याचा खूपच त्रास होताे, असे येथील रहिवासी ॲड. निरंत पाटील यांनी सांगितले.
.............
पालिकेच्या उद्यान विभागाकडून खारघरमध्ये वृक्षरोपण
खारघर, ता. १५ (बातमीदार) : पालिकेच्या उद्यान विभागाच्या वतीने खारघर सेक्टर सातमधील रस्त्याच्या कडेला तसेच खारघर सेक्टर १५ कोपरा पुलाच्या शेजारी आंबा, जांभूळ-बहाडोली, पेरू, बहावा, कांचन, कडुनिंब अशा विविध प्रकारच्या ५० रोपांची लागवड करण्यात आली आहे. हा उपक्रम पालिका आयुक्त मंगेश चितळे, अतिरिक्त आयुक्त गणेश शेटे आणि उपायुक्त डॉ. वैभव विधाते यांच्या मार्गदर्शनाखाली पार पडला. यावेळी साहाय्यक आयुक्त डॉ. रूपाली माने, उद्यान पर्यवेक्षक नितीन राठोड, पर्यवेक्षक रूपेश चित्रुक, वैभव ठाकरे उपस्थित होते. या उपक्रमात उद्यान विभाग, गुडविल पॅराडाईज, जय दुर्गा फेरीवाला माता मंडळ आणि रोटरी क्लब ऑफ नवी मुंबई सनराईसचे पदाधिकारी सहभागी झाले होते. अशा प्रकारे महापालिका आणि विविध संस्‍थांच्या माध्यमातून पर्यावरणाच्या संवर्धनासाठी खारघर परिसरातील विविध सेक्टरमध्ये वृक्षारोपण केले जात आहे. तसेच नागरिकांनी या उपक्रमात सहभागी व्हावे, असे आवाहन उद्यान विभागाकडून करण्यात आले आहे.