अंधेरी (बातमीदार)ः भरधाव वेगात जाणाऱ्या एका कारने रस्ता ओलांडणाऱ्या ५० वर्षांच्या महिलेला धडक दिल्याने तिचा मृत्यू झाला. वांद्रे-वरळी सी लिंकवर रविवारी रात्री १० वाजता हा अपघात झाला होता. भरधाव वेगातील एका कारने एका महिलेला धडक दिली होती. या अपघातानंतर चालकाने वांद्रे पोलिस ठाण्यात अपघाताची माहिती दिली होती. त्यानुसार पोलिसांनी घटनास्थळावरून जखमी महिलेला भाभा रुग्णालयात दाखल केले. उपचारादरम्यान या महिलेचा मृत्यू झाला. या महिलेची ओळख पटली नाही. त्यामुळे तिची ओळख पटविण्यासाठी पोलिसांकडून प्रयत्न सुरू आहेत. या प्रकरणात पोलिसांनी सांताक्रूझ येथे राहणाऱ्या एका व्यावसायिकाला अटक केली होती, पण त्याला नोटीस देऊन सोडून देण्यात आले आहे.