अंबरनाथ, ता. १५ (वार्ताहर) : सरकारकडून ३२ रुपयांचा दर असूनही आठ रुपये किलोमीटरचा भाडेदर कॅबचालकांना मिळत असल्याने संतापलेल्या ओला कॅबचालकांनी अंबरनाथच्या हुतात्मा चौकात संप पुकारला. साधारण १०० गाड्या उभ्या करून जोपर्यंत आम्हाला ३२ रुपयांचा भाडेदर मिळत नाही, तोपर्यंत आम्ही हा संप सुरूच ठेवणार, अशी भावना कॅबचालकांनी व्यक्त केली आहे.

राज्य सरकार, तसेच विविध महापालिका परिवहन सेवेच्या बस प्रवाशांच्या तुलनेत अपुऱ्या पडत आहेत. यामुळे अनेक प्रवासी ओला, उबेर या खासगी कंपनीच्या वाहतुकीचा पर्याय निवडतात. या कंपन्यांच्या वाहनांना प्रवाशांची मोठी मागणी आहे. मात्र, दर कपात तसेच इतर विविध कारणांमुळे ओला, उबेरचालकांनी अचानक संप पुकारल्याने वाहतूक ठप्प झाली आहे. शहरातील हुतात्मा चौकात सुमारे १०० ओलाचालकांनी एकत्रित येऊन संप पुकारला. जोपर्यंत आम्हाला ३२ रुपयांचा भाडेदर मिळत नाही, तोपर्यंत हा संप सुरू राहील, असे चालकांनी सांगितले. दरम्यान, ओला, उबेर यांचा हा राज्यव्यापी संप डॉ. केशव शिरसाट यांच्या मार्गदर्शनाखाली सुरू असून, मुंबई येथील आझाद मैदानात या मोर्चाला हजारो ओला-उबेर चालकांनी पाठिंबा दर्शवला आहे.

आम्ही आठ ते नऊ लाखांची गाडी खरेदी करून कमीतकमी ७० ते ८० हजारांचा कर भरतो. त्याचप्रमाणे विमा व इतर खर्चही आहे. आम्हाला आठ रुपयांप्रमाणे दर मिळतो. शासकीय अध्यादेशानुसार ३२ रुपये प्रति किलोमीटर मिळण्याची मागणी आहे. सरकार व प्रादेशिक परिवहन कार्यालय अधिकारी सर्वसामान्य मालक व चालकांची पिळवणूक करत आहे. ही भयाण परिस्थिती ओलाची आहे.
- किशोर साठे, ओला चालक

आम्हाला ओला उबेरमुळे खूप त्रास सहन करावा लागतो. ग्राहकाकडून २०, २२, २५ रुपये भाडेदर घेऊन आम्हाला मात्र आठ रुपये देतात. यामध्ये आम्हाला कर, कर्ज, विमा भरायचा असतो. चुकून एखादी घटना घडल्यास दंडही भरावा लागतो. त्यामुळे आम्हाला मिळणारा भाडेदर हा खूप कमी आहे. शिवाय ५ टक्के कर कापला जातो. त्यामुळे आता या गाडीला आग लावावी का? अशी संतप्त प्रतिक्रिया चालकांनी दिली. दरम्यान, सरकार अध्यादेशानुसार भाडेदर मिळत नाही, तोपर्यंत हा संप सुरू राहील.
- नितीन शिंदे, चालक