‘योगी आदित्यनाथ’ चित्रपट निर्माता कंपनीची उच्च न्यायालयात धाव
‘सीबीएफसी’कडून प्रमाणपत्र मिळण्यास विलंब होत असल्याचा दावा

सकाळ वृत्तसेवा,
मुंबई, ता. १५ : उत्तर प्रदेशचे मुख्यमंत्री योगी आदित्यनाथ यांच्या जीवनावर आधारित चित्रपटाच्या निर्मात्या कंपनीने मंगळवारी (ता. १५) उच्च न्यायालयात धाव घेतली आहे. केंद्रीय चित्रपट प्रमाण मंडळ (सीबीएफसी)कडून प्रमाणपत्र देण्यास विलंब होत असल्याचा दावा निर्मात्या कंपनीने याचिकेत केला आहे. याचिकेची दखल घेऊन न्यायालयाने सीबीएफसी भूमिका स्पष्ट करण्याचे आदेश दिले.

योगी आदित्यनाथ यांच्या जीवनावर आधारित ‘द मॉन्क हू बिकेम चीफ मिनिस्टर’ या पुस्तकावर आधारित ‘अजेय : द अनटोल्ड स्टोरी ऑफ अ योगी’ हा चित्रपट १ ऑगस्ट रोजी चित्रपटगृहात प्रदर्शित होणार होता. परंतु या चित्रपटाच्या टीझर, ट्रेलर आणि प्रमोशनसह गाण्याला प्रमाणपत्र देण्याबाबत सीबीएफसीकडून होणाऱ्या मनमानी, अवास्तव विलंबावर चित्रपट निर्माते सम्राट सिनेमॅटिक यांनी याचिकेतून प्रश्नचिन्ह उपस्थित केले. तसेच कायद्यात कोणतीही तरतूद नसतानाही उत्तर प्रदेशच्या मुख्यमंत्री कार्यालयाकडून ना हरकत प्रमाणपत्राची मागणी केल्याचा दावाही निर्मात्या कंपनीने सुनावणीदरम्यान केला. याचिकेवर न्या. रेवती मोहिते-डेरे आणि न्या. डॉ. नीला गोखले यांच्या खंडपीठासमोर सुनावणी झाली. त्या वेळी सीबीएफसीच्या वतीने उपस्थित अधिकाऱ्याने वकिलाची नियुक्ती करण्यासाठी वेळ मागितला. न्यायालयाने मंडळाची मागणी मान्य केली तसेच मंडळाला कायद्याने विहित केलेल्या वेळेत चित्रपटाला प्रमाणपत्र देणे आवश्यक आहे. त्या बंधनापासून ते पळ काढू शकत नाहीत, अशी तोंडी टिप्पणी न्यायालयाने केली आणि सेन्सॉर बोर्डाला नोटीस बजावून १७ जुलै रोजी सुनावणी ठेवली.