दरडप्रवण क्षेत्रात प्रशासनाकडून विशेष लक्ष
खालापूरमध्ये आपत्‍कालीन यंत्रणा सज्‍ज

खोपोली, ता. १६ (बातमीदार) ः तीन दिवसांपासून सुरू असलेल्‍या धुवाधार पावसामुळे खोपोली-खालापूर परिसराला अक्षरशः झोडपले आहे. दरडप्रवण क्षेत्रात प्रशासनाकडून विशेष लक्ष दिले जात असून, आपत्कालीन यंत्रणांना सज्ज ठेवण्यात आली आहे.
सततच्या पावसामुळे भात लागवड व शेतीची कामे खोळंबली आहेत. पावसामुळे नद्या, नाले तुडुंब भरले आहेत. पाताळगंगा नदीला मंगळवारी पूर आला होता. खोपोली शहरातील अनेक सखल भागात मोठ्या प्रमाणावर पाणी भरले. मुसळधार पावसाच्या पार्श्वभूमीवर तहसीलदार कार्यालयाकडून नागरिकांना नदीकाठी न जाण्याचा सूचना देण्यात आल्या आहेत. दरडप्रवण क्षेत्रात प्रशासनाकडून विशेष लक्ष दिले जात असून, आपत्कालीन यंत्रणांना सज्ज ठेवण्यात आले आहे.
महामार्गवरही ठिकठिकाणी पाणी भरल्याने पनवेल-खोपोली, खोपोली-पाली, खोपोली-पेण वाहतूक संथ गतीने सुरू होती. मंगळवारी रात्रीही पावसाचा जोर कायम राहिल्याने बुधवारी हनुमान मंदिर पटांगण, डीसी नगर, शास्त्री नगर, खालची खोपोली परिसरासह अन्य ठिकाणी पाणी तुंबल्याने रहिवाशांना गैरसोयीनचा सामना करावा लागला.

खोपोली : मुसळधार पावसाने सखल भागात पाणी साचले होते.

-------

म्हसळा-माणगाव वाहतूक विस्‍कळित
म्हसळा, ता. १६ (बातमीदार) ः म्हसळा-माणगावदरम्यानचा ढोरजे गावातील पूल पाण्याखाली गेल्याने वाहतूक विस्‍कळित झाली आहे. याबाबत नागरिकांनी प्रशासनाकडे वारंवार तक्रार करून पुलाच्या नूतनीकरणाची मागणी केली आहे, मात्र सातत्याने दुर्लक्ष होत आहे. कुडतुडीकडे जाणाऱ्या रस्त्यावर मोठे झाड तसेच दरड कोसळल्‍याने परिसरातील आठ ते १० गावांचा मंगळवारी संपर्क तुटला होता. त्याचप्रमाणे हिंगुळडोह तुडुंब भरल्याने रस्‍ता पाण्याखाली गेला होता. जानसई नदीचे पाणी शहरात घुसल्याने म्हसळा-दिघीकडे जाणारा रस्ता बंद झाला होता. अतिवृष्टीमध्ये नागरिकांनी सतर्क राहण्याचे आवाहन तहसीलदार सचिन खाडे यांनी केले आहे.

म्‍हसळा ः

-----------------

कशेडी घाटातील नवीन मार्गावर दरड कोसळली
पोलादपूर (बातमीदार) ः अतिवृष्‍टीमुळे मुंबई-गोवा महामार्गावरील कशेडी घाटात मंगळवारी खेड हद्दीत बोगद्यापासून २०० मीटर अंतरावर दरड कोसळण्याची घटना घडली. मे व जून महिन्यातही याच ठिकाणी दरड कोसळून वाहतुकीला खोळंबा झाला होता. दरड कोसळल्याने मुंबई दिशेने जाणारी एकच मार्गिका सुरू होती.
...........