पेण- खोपोली मार्गाची दुरवस्था
गागोदे खिंड ते आरावपर्यंत खड्ड्यांमुळे वाहनचालक त्रस्त
पेण, ता. १६ (वार्ताहर) : पेण- खोपोली राज्य मार्गावर गागोंदे खिंड ते आरावपर्यंत रस्त्याची दुरवस्था झाली आहे. अनेक ठिकाणी पडलेल्या खड्ड्यांमुळे वाहनचालक त्रस्त आहेत. या ठिकाणी कधीही अपघात घडू शकेल, अशी भीती असल्याने संबंधित खात्याने याकडे लक्ष देऊन रस्त्यावरील खड्डे तत्काळ बुजवावेत, अशी मागणी वाहनचालकांसह नागरिकांकडून करण्यात येत आहे.
गेल्या काही वर्षांपूर्वी पेण-खोपोली राज्य मार्गावरील चांगल्या पद्धतीने झालेल्या रस्त्याच्या कामामुळे वाहनधारक समाधानी झाले होते. परंतु काही महिन्यांपासून पेण तालुक्यातील गागोदे खिंड, गागोदे बुद्रुक, वरसई फाटा, आरावपर्यंतच्या रस्त्याची पावसाळ्यात दुरवस्था झाली असून, ठिकठिकाणी मोठमोठे खड्डे पडले आहेत. त्यामुळे खड्ड्यातून मार्ग काढताना वाहनधारकांची फार मोठी कसरत होत आहे. त्यातच या ठिकाणी कधीही मोठ्या प्रमाणावर अपघात होण्याची भीती आहे. त्यामुळे गागोदे खिंड ते आरावदरम्यान रस्त्यावरील पडलेले खड्डे तत्काळ भरावे आणि रस्ता सुरळीत करावा, अशी मागणी नागरिकांकडून होत आहे.
...........................
रस्त्याचे काम दोन वर्षांपासून सुरू आहे; परंतु हेटवणे कॉलनी ते आरावपर्यंत रस्ता पूर्णतः नादुरुस्त झाला आहे. अनेक ठिकाणी मोठमोठे खड्डे पडले आहेत. त्यामुळे अपघात होण्याची दाट शक्यता असल्याने वारंवार येथील नागरिकांनी राष्ट्रीय महामार्गाच्या अधिकाऱ्यांशी संपर्क साधला. परंतु याकडे दुर्लक्ष केले जात असल्याने येत्या दोन दिवसांत रस्त्याची दुरुस्ती झाली नाही तर राष्ट्रीय महामार्गाच्या कार्यालयासमोर जनआंदोलन छेडण्यात येईल, असा इशारा सामाजिक कार्यकर्ते संदीप पाटील यांनी दिला आहे.
....................
गागोदे खिंड ते आराव रस्त्यावर पडलेले खड्डे तत्काळ बुजवण्याचे काम सुरू आहे. मागील काही दिवसांत पाऊस जास्त पडल्याने काम थांबवले होते. परंतु गागोदे खिंड येथील रस्ता वन विभागाच्या अखत्यारीत येत असून त्याचे रुंदीकरण रखडले आहे. परवानगी येताच तेही पूर्ण केले जाईल. तोपर्यंत जे खड्डे पडले आहेत ते भरून रस्ता सुसज्ज करण्यात येत आहे.
- रवींद्र कदम, अभियंता, राष्ट्रीय महामार्ग