वाडा, ता. १६ (बातमीदार) : तालुक्याच्या ग्रामीण भागातील शिक्षणाच्या समस्या जाणून सामाजिक बांधिलकी म्हणून आम्ही शाळांना फक्त भौतिक सुविधा देत नाही. या तालुक्यातील दुर्गम, आदिवासी भागात तळागाळातल्या विद्यार्थ्यांची शैक्षणिक प्रगती कशी होईल, यासाठी सेवा सहयोग फाउंडेशनच्या जोडीने आम्ही विविध स्तरांवर काम करीत असल्याचे प्रतिपादन मोतीलाल अग्रवाल फाउंडेशनच्या अध्यक्षा सुनीता अग्रवाल यांनी केले.

मोतीलाल अग्रवाल फाउंडेशन व सेवा सहयोग फाउंडेशन, मुंबई यांच्या सौजन्याने चिंचघर येथील ह. वि. पाटील विद्यालय आणि कै. घ. बा. पाटील कनिष्ठ महाविद्यालयाच्या नवीन इमारत, नूतनीकरण व स्वच्छतागृह यांचा छात्रार्पण सोहळ्याच्या आयोजित कार्यक्रमानिमित्त त्या बोलत होत्या. या कार्यक्रमाला सेवा सहयोग फाउंडेशनचे प्रमुख किशोर मोघे, दीपाली देवळे, महर्षी वैष्णव, राम रोकडे, अश्विनी पवार, संदीप पवार, तसेच संस्थेचे अध्यक्ष मधुकर पाटील, सचिव श्रीकांत भोईर, सदस्य गणेश पाटील, तालुक्यातील सर्व माध्यमिक शाळांचे मुख्याध्यापक, शिक्षक, कर्मचारी व विद्यार्थी उपस्थित होते.