नवजात बालकांना सुरक्षा कवच
अपहरण, चोरी रोखण्यासाठी नवी प्रणाली लागू
सकाळ वृत्तसेवा
मुंबई, ता. १६ : नवजात बालकांचे अपहरण किंवा चोरी रोखण्यासाठी राज्य सरकारने सर्व शासकीय वैद्यकीय महाविद्यालये आणि रुग्णालयांमध्ये नव्या मानक कार्यपद्धती (एसओपी) लागू करण्याचे आदेश आरोग्य विभागाने दिले आहेत. त्यानुसार नोंदणी, सुरक्षा व्यवस्थेसह ‘कोड पिंक’ अलर्ट प्रणाली सीसीटीव्ही, पॅनिक अलार्म आणि मासिक सुरक्षा तपासणी बंधनकारक केले आहे.
नव्या कार्यपद्धतीनुसार गर्भवती महिलांची नोंदणी आधार, फोटो आणि मोबाईल क्रमांकासह केली जाणार असून प्रसूतीनंतर आई आणि नवजात बाळाच्या हातांवर एकसारखे ओळख टॅग लावले जातील. बाळाच्या पायाचे व आईचे अंगठ्याचे ठसे घेण्यात येतील. प्रसूतिपूर्व तपासणीपासून ते डिस्चार्जपर्यंत सर्वच टप्प्यांत ओळख आणि सुरक्षा यंत्रणा काटेकोर राबवली जाणार आहे. रुग्णालयातील प्रसूती कक्ष, शस्त्रक्रिया विभाग, प्रसूतिपश्चात कक्ष आणि नवजात अतिदक्षता कक्षात (NICU) सीसीटीव्ही आणि सुरक्षा रक्षक तैनात केले जातील. तसेच रुग्णभेटीच्या वेळा ठरवून देण्यात येतील, बाळाला रुग्णालयाबाहेर नेण्यापूर्वी डॉक्टरांची परवानगी बंधनकारक करण्यात आली आहे.
-------------------------------------------
सुरक्षेला नवे बळ
‘कोड पिंक’ प्रणालीत बाळ हरवल्याचा संशय आल्यास तत्काळ प्रवेशद्वारे बंद करण्यात येतील आणि पोलिसांना कळवले जाईल. दर तीन महिन्यांनी या यंत्रणेची मॉक ड्रिल घेण्यात येणार आहे. सर्व संबंधित कर्मचाऱ्यांना एसओपीनुसार प्रशिक्षण देणे बंधनकारक असून, आठवड्याला सुरक्षा बैठक आणि तिमाही अहवाल वैद्यकीय शिक्षण संचालनालयाकडे सादर करणेही अनिवार्य केले आहे. या निर्णयामुळे नवजात बालकांच्या सुरक्षेला नवे बळ मिळणार आहे.
----------------------------------------
विविध टप्पे
प्रसूतिपूर्व तपासणी कक्ष
प्रसूती कक्ष
शस्त्रक्रिया कक्ष
प्रसूतिपश्चात कक्ष
डिस्चार्ज प्रक्रिया
नवजात अतिदक्षता कक्ष