सकाळ वृत्तसेवा
मुंबई, ता.१६ ः मला आयुष्यात अनेक प्रलोभने आली, पण मी त्याला कधीही बळी पडलो नाही. मी कायम आंबेडकरी कुटुंबासोबत राहिलो. तरुणांकडून माझ्या अपेक्षा आहेत. तुम्ही जे काही कराल त्यावर निष्ठा आणि सातत्य ठेवा. निवडणुकीच्या राजकारणात विकले जाऊ नका. तुमच्या विचाराचे लोक निवडून द्या, असे आवाहन ज्येष्ठ साहित्यिक आणि दलित पॅंथरचे सहसंस्थापक ज. वि. पवार यांनी केले. दलित पॅंथरच्या वर्धापनदिन कार्यक्रमात बोलत होते.
दलित युथ पँथरच्या वतीने दलित पँथरचा वर्धापनदिन आणि दलित पँथरचे सह संस्थापक ज्येष्ठ साहित्यिक ज. वि. पवार यांचा वाढदिवस अनोख्या पद्धतीने दादरच्या शिवाजी नाट्य मंदिर येथील शाहू महाराज सभागृहात मंगळवारी (ता. १५) साजरा झाला.
याप्रसंगी ज. वि. पवार यांनी उपस्थितांना संबोधित केले. डॉ. बाबासाहेब आंबेडकर यांच्या महापरिनिर्वाणदिनी, बाबासाहेबांच्या जयंतीदिनी, समाजात कुठेही अत्याचार झाला तर एकत्र येतो. मात्र निवडणुकीच्या काळात ही शक्ती विखुरली जाते. रस्त्यावरची लढाई किती दिवस लढणार? त्यासाठी फुले, शाहू, आंबेडकरी विचारांच्या लोकांना निवडून द्या. पैशासाठी विकले जाऊ नका. प्रलोभनाला बळी पडू नका. तुमच्यावरील अन्यायाला तुम्हीच जबाबदार आहात. तरुण पिढीने जबाबदारीने वागावे, असा सल्ला पवार यांनी दिला. या वेळी दलित पँथरचे संस्थापक राजा ढाले आणि नामदेव ढसाळ यांच्यासह इतर सहकाऱ्यांच्या आठवणींना उजाळा देण्यात आला.