दुर्गाडी किल्ल्याप्रकरणी ठेकेदार, अधिकाऱ्यांवर कारवाई करा : आमदार भोईर
कल्याण, ता. १८ (वार्ताहर) : ऐतिहासिक दुर्गाडी किल्ल्याची संरक्षक भिंत कोसळल्याप्रकरणी संबंधित ठेकेदाराला काळ्या यादीत टाका आणि या कामामध्ये हलगर्जी करणाऱ्या शासनाच्या अधिकाऱ्यांवरही कारवाई करण्याची मागणी कल्याण पश्चिमचे आमदार विश्वनाथ भोईर यांनी केली आहे. विधानसभेच्या पावसाळी अधिवेशनात आज आमदार भोईर यांनी औचित्याच्या मुद्द्याद्वारे ही मागणी केली.
छत्रपती शिवाजी महाराजांच्या पदस्पर्शाने पावन झालेल्या या किल्ल्याच्या डागडुजीच्या कामात कोट्यवधी रुपयांचा निधी वापरला जात असतानाही, कामाच्या दर्जाबाबत गंभीर प्रश्न निर्माण झाले आहेत, असे भोईर यांनी सभागृहात सांगितले.
आमदार भोईर म्हणाले, की त्यांनी स्वतः घटनास्थळी पाहणी केली असता, निर्माणाधीन भिंतीचा मोठा भाग त्यांच्यासमोरच कोसळला. या घटनेने शिवप्रेमी आणि कल्याणकरांमध्ये संतापाची भावना आहे. या घटनेचे गांभीर्य लक्षात घेता यामध्ये हलगर्जी करणाऱ्या ठेकेदाराला काळ्या यादीत टाकावे आणि इतके महत्त्वाचे काम सुरू असतानाही महिनोंमहिने त्या ठिकाणी न येणाऱ्या संबंधित अधिकाऱ्यांवरही कडक कारवाई करण्याची मागणी भोईर यांनी या वेळी केली.