कल्याण पूर्वेत डम्पिंग ग्राउंडच्या विरोधात नागरिक रस्त्यावर
कल्याण, ता. १८ (वार्ताहर) : कल्याण पूर्वेतील १०० फुटी रोड, वसंत वाटीका जवळील पालिकेच्या भूखंडावरील निर्माणाधीन डम्पिंग ग्राउंडच्या विरोधात स्थानिक रहिवासी आज रस्त्यावर उतरले आणि निदर्शने केली.
कल्याण पूर्वेतील १०० फूट रोड, शिवरल चौक येथे कल्याण-डोंबिवली महानगरपालिका मलनिस्सारण आरक्षण क्र. ३३० येथे होत असलेल्या कचरा एकत्रीकरण, प्रेसिंग कचरा वाहतूक व कचरा गाड्यांच्या वाहनस्थळ प्रकल्पास स्थानिक रहिवाशांचा विरोध असून, या प्रकल्पाविरोधात रहिवासी आक्रमक झाले आहेत. हा प्रकल्प मानवी वस्तीपासून दूर स्थलांतर करण्याची मागणी या नागरिकांनी केली आहे.
आम आदमी पार्टीचे जिल्हाध्यक्ष धनंजय जोगदंड यांनी सांगितले की, पालिकेने कल्याण पूर्वेतील आरक्षण क्र. ३३० या आरक्षणानुसार मलनिस्सारण, पाणीपुरवठा, उघान याऐवजी आरक्षणात बदल करून घनकचरा प्रकल्प उभारण्याचा घाट घातला आहे. याबाबत हरकती सूचना घेतल्या होत्या का, असा प्रश्न उपस्थित करत जोगदंद यांनी बेकायदेशीरपणे होत असलेल्या घनकचरा प्रकल्पाला विरोध असून, नागरी आरोग्याच्या दुष्टिकोनातून या परिसरात हा प्रकल्प होणार नाही, असा इशारा दिला आहे.