‘बोरिवली तहसीलमधील आपले सरकार सेवा केंद्र तातडीने सुरू करा’
अस्लम शेख यांची विधानसभेत मागणी
मालाड, ता. १९ (बातमीदार) ः बोरिवली तहसील कार्यालयातील आपले सरकार सेवा केंद्र दीड महिना बंद राहणार आहे, अशी माहिती मिळाली असून हे एवढ्या कालावधीसाठी बंद राहिले तर विद्यार्थ्यांनी जायचे कुठे, असा सवाल आमदार अस्लम शेख यांनी विचारला आहे. तसेच, हे आपले सरकार सेवा केंद्र तातडीने सुरू करावे, अशी मागणी अस्लम शेख यांनी औचित्याच्या मुद्द्याद्वारे विधानसभेत केली होती.
अस्लम शेख म्हणाले, की बोरिवली तालुक्याच्या तहसील कार्यालयातील आपले सरकार सेवा केंद्र दीड महिना बंद राहणार, अशी माहिती मला मिळाली आहे. आपले सरकार सेवा केंद्राच्या बाहेर व्हीएलई केंद्रांची यादी लावली आहे. तसेच, व्हीएलई केंद्रावर दाखले काढून देण्यासाठी भरमसाट रक्कम आकारण्यात येते, अशा तक्रारी मला प्राप्त झाल्या आहेत. जे दाखले तहसील कार्यालयाच्या आपले सरकार केंद्रांवर ३४ एवढ्या कमी किमतीत मिळतात त्या दाखल्यांसाठी तीन ते चार हजार रुपये विद्यार्थ्यांकडून आकारले जात आहेत.
जून व जुलै हा शैक्षणिक प्रवेशांचा कालावधी असतो. विद्यार्थ्यांना फार मोठ्या प्रमाणावर शैक्षणिक दाखले लागत असतात. अशात आपले सरकार सेवा केंद्र का बंद करण्यात आले? गोरगरीब विद्यार्थ्यांनी जायचे कुठे? ऐन शैक्षणिक प्रवेशाच्या कालावधीत निविदा प्रक्रिया राबवून नव्या कंपनीला आपले सरकार सेवा केंद्राचे काम दिल्यामुळे हे सर्व घडत आहे, असे अस्लाम शेख यांनी म्हटले आहे.