अमली पदार्थ विक्रीप्रकरणी सहा जण अटकेत
५४ लाख ४६ हजारांचा मुद्देमाल जप्त
सकाळ वृत्तसेवा
ठाणे, ता. १९ : ठाणे शहर पोलिस आयुक्तालयाच्या अमली पदार्थविरोधी पथकाने मोठी कारवाई करीत उल्हासनगर, डोंबिवली, कळवा आणि मुंब्रा येथे ५४ लाख ४६ हजार रुपये किमतीचे अमली पदार्थ जप्त केले आहेत. याप्रकरणी सहा जणांना अटक करण्यात आली आहे.
पोलिसांनी दिलेल्या माहितीनुसार, जप्त केलेल्या अमली पदार्थांमध्ये १५७.३ ग्रॅम एमडी पावडर आणि ४१ किलो ९७४ ग्रॅम गांजाचा समावेश आहे. उल्हासनगरमधून जय रेवगडे आणि साहिल कांगणे यांना एमडी पावडरसह अटक करण्यात आली, तर डोंबिवलीतून कल्पेश निंबाळकर आणि आशीष आंबोकर यांनाही एमडी पावडरसह ताब्यात घेण्यात आले. कळव्यातून ओरिसातील राजेंद्र महंत याला ४० किलो गांजासह अटक करण्यात आली, तर मुंब्रामधून शोएब युसूफ शेख याला गांजासह जेरबंद करण्यात आले.
या गुन्ह्यांमध्ये आणखी कोणाचा सहभाग आहे का, याचा तपास सुरू असल्याचे पोलिसांनी सांगितले. पोलिस उपायुक्त (गुन्हे) अमरसिंह जाधव आणि सहायक पोलिस आयुक्त विनय घोरपडे यांच्या मार्गदर्शनाखाली ही कारवाई करण्यात आली.