खारघर, ता. १९ (बातमीदार) : दहा ग्रॅम सोने बुकिंग केल्यास दरमहा सोळाशे रुपये परतावा मिळवून देण्याचे प्रलोभन दाखवून पनवेलमधील डी. एम. कोठारी या सराफाने अनेकांना कोट्यवधी रुपयांचा गंडा घातला. पोलिसांनी सराफाला अटक करून न्याय द्यावा, अशी मागणी फसवणूक झालेल्या ग्राहकांकडून होत आहे.
पनवेलमधील डी. एम. कोठारी ज्वेलर्सने २०२३ मध्ये जास्‍तीचे व्याज मिळेल, असे सांगून गुंतवणुकीचा व्यवसाय सुरू केला. सुरुवातीला वर्षभर त्याने काही जणांना याचे १० ग्रॅम सोन्याच्या भावाचे पैसे गुंतवणुकीवर १,६०० रुपयांचे व्याज दिले. काही गुंतवणूकदारांनी या योजनेचा लाभ घेतला, तसेच आपल्‍या मित्र परिवाराला पैसे गुंतवण्यास सांगितले. त्यामुळे काही जणांचे १५ लाख, तर काहींचे ३४ लाख रुपये असे एकूण १७ जणांचे सहा कोटी ५० लाख रुपये गुंतवणूक करण्यात आले. गतवर्षी जुलैमध्ये डी. एम. कोठारी आपल्या परिवारासह पसार झाल्यामुळे फसवणूक झालेल्‍या १७ जणांनी १९ जुलै २०२४ रोजी पनवेल शहर पोलिस ठाण्यात तक्रार दाखल केली. त्‍यानंतर हे प्रकरण बेलापूर येथील नवी मुंबई पोलिस आयुक्तालयात आर्थिक गुन्हे शाखेकडे गेले; मात्र वर्ष उलटूनही आरोपींचा शोध लागलेला नाही. गुंतवूणकदाराकडून मिळालेल्या माहितीनुसार कोठारी यांनी वकिलामार्फत अटकपूर्व जामिनासाठी प्रयत्न केले; मात्र पनवेल न्यायालयात, उच्च न्यायालयात आणि सर्वोच्च न्यायालयातदेखील त्यांना जामीन मिळाला नाही.

गुंतवणुकीचे प्रलोभन दाखवून फसवणूक केल्‍याप्रकरणी गुन्हा दाखल झाल्यावर डी. एम. कोठारी या सराफाचे बँक खाते गोठवले आहे. गुंतवणूकदारांचे नुकसान होणार नाही, या दिशेने तपास सुरू असून आरोपीचा शोध सुरू आहे.
- अमोल शिंदे, सहाय्यक निरीक्षक, आर्थिक गुन्हे शाखा, नवी मुंबई