लैंगिक अत्याचार करणारा आरोपी गजाआड
नवी मुंबई, ता. १९ (वार्ताहर) : लग्नाचे प्रलोभन दाखवून तरुणीवर वारंवार लैंगिक अत्याचार करणारा तसेच तिला गोळ्या देऊन गर्भपात करण्यास भाग पाडणारा आरोपी मोहित विजेंद्र सिंग (वय ३०) या आरोपीला उलवे पोलिसांनी अटक केली आहे. या प्रकरणातील पीडित तरुणीसोबत गैरवर्तन करणाऱ्या आरोपीच्या साथीदाचा पोलिसांकडून शोध घेण्यात येत आहे.
या प्रकरणातील आरोपी मोहित सिंग याने गत फेब्रुवारीत उलवे परिसरात राहणाऱ्या तरुणीसोबत प्रेमसंबध निर्माण करून तिला लग्नाचे प्रलोभन दाखविले होते. त्यानंतर आरोपीने पीडित तरुणीच्या इच्छेविरुद्ध तिच्यावर अनेक वेळा जबरदस्तीने लैंगिक अत्याचार केले. त्यामुळे पीडित तरुणी गरोदर राहिल्यानंतर आरोपीने तिला गर्भपाताच्या गोळ्या आणून जबरदस्तीने खाण्यास दिल्या. शिवाय तिला गर्भपात करण्यास भाग पाडले. गर्भपातानंतर आरोपीने त्याच्या मोबाईलवर रक्तस्रावाचे फोटो व व्हिडिओ काढले. गर्भपातानंतर आरोपीने लग्नाचे आश्वासन देत पीडित तरुणीसोबत पुन्हा जबरदस्तीने लैंगिक अत्याचार केले. या प्रकारामुळे पीडित तरुणी १४ जुलै रोजी पोलिस ठाण्यात तक्रार देण्यासाठी गेली असता, आरोपी मोहित सिंग याने माफी मागून तिला घरी आणले. त्यानंतर त्याने त्याच दिवशी पुन्हा पीडित तरुणीच्या इच्छेविरुद्ध लैंगिक अत्याचार केले. पीडित तरुणीने आरोपी मोहित सिंग याच्याकडे लग्नासाठी तगादा लावल्यानंतर १५ जुलै रोजी आरोपी मोहित सिंग याने लग्न केल्याचे संयुक्त कागदपत्र दाखवले. त्यानंतर त्याने लग्न केल्याचे पीडित तरुणीला सांगून त्याच्याविरोधात पोलिस ठाण्यात गुन्हा दाखल करू शकत नाही, असे धमकावले. त्यानंतर आरोपीने पीडित तरुणीचे फोन घेणे बंद केले होते.