विशेष सहाय्य कार्यक्रमांतर्गत गरजूंना आर्थिक सहाय्य
वर्षभरात ४१ हजार ८९८ लाभार्थ्यांना लाभ
अलिबाग, ता. २३ (वार्ताहर) : राज्य आणि केंद्र सरकारच्या विशेष सहाय्य कार्यक्रमांतर्गत रायगड जिल्ह्यात आर्थिक वर्ष २०२४-२५ मध्ये ४१ हजार ८९८ लाभार्थ्यांना विविध योजनांतर्गत आर्थिक मदत दिली गेली आहे. या कार्यक्रमांतर्गत सहा महत्त्वाच्या योजना राबविण्यात येतात. यात इंदिरा गांधी राष्ट्रीय वृद्धापकाळ निवृत्तिवेतन योजना, विधवा निवृत्तिवेतन योजना, अपंग निवृत्तिवेतन योजना, राष्ट्रीय कुटुंब अर्थसहाय्य योजना, संजय गांधी निराधार अनुदान योजना आणि श्रावणबाळ सेवा राज्य निवृत्तिवेतन योजना यांचा समावेश आहे.
संजय गांधी निराधार अनुदान योजनेअंतर्गत २३ हजार ९०४ लाभार्थ्यांना मदत देण्यात आली आहे, तर श्रावणबाळ सेवा निवृत्तिवेतन योजनेअंतर्गत नऊ हजार ५९६ लाभार्थ्यांना निवृत्तिवेतन प्रदान करण्यात आले आहे. इंदिरा गांधी राष्ट्रीय वृद्धापकाळ निवृत्तिवेतन योजनेत सहा हजार ३३९ ज्येष्ठ नागरिक लाभार्थी आहेत. याव्यतिरिक्त, विधवा निवृत्तिवेतन योजनेत एक हजार ७३१ विधवा महिलांना, अपंग निवृत्तिवेतन योजनेत २८५ दिव्यांग व्यक्तींना आर्थिक सहाय्य दिले गेले आहे. राष्ट्रीय कुटुंब अर्थसहाय्य योजनेत ४३ कुटुंबांना २० हजार रुपये प्रति कुटुंब दिले गेले. प्रत्येक लाभार्थ्याला दर महिन्याला १,५०० रुपये थेट त्यांच्या खात्यात जमा केले जातात.