विद्यार्थ्यांची दिशाभूल करून १६ लाखांचा अपहार
लोणेरे विद्यापीठातील कंत्राटी कर्मचाऱ्याला पोलिसांनी केली अटक
श्रीवर्धन, ता. २० (बातमीदार) : माणगाव तालुक्यातील लोणेरे येथील डॉ. बाबासाहेब आंबेडकर तंत्रशास्त्र विद्यापीठात कंत्राटी पद्धतीने कार्यरत असलेल्या कर्मचाऱ्याने विद्यार्थ्यांची दिशाभूल करून दुप्पट फी आकारणीसह खानावळीच्या पैशांमध्ये अपहार करून स्वतःच्या खात्यात सुमारे १६ लाखांहून अधिक रुपये जमा केल्याचा धक्कादायक प्रकार उघड झाला आहे. याप्रकरणी गोरेगाव पोलिसांनी आरोपी सुमीत जाधववर गुन्हा दाखल केला असून, शनिवारी रात्री त्याला अटक करण्यात आली आहे.
जुलै २०२४ मध्ये वसतिगृह कर्मचाऱ्यांचे पगार थकले असताना ही बाब समोर आली. त्‍यामुळे खात्यात पैसे का नाहीत, याचा शोध घेतला असता संपूर्ण प्रकार उघड झाला. एकूण १२८ विद्यार्थ्यांकडून १५ लाख ७८ हजार ५०० रुपये क्‍यूआर कोडने घेण्यात आले होते, तसेच एसबीआय चेकवर बनावट रक्कम नमूद करून ६० हजार रुपयांचा अतिरिक्त अपहार करण्यात आला. संपूर्ण अपहाराची रक्कम सुमारे १६ लाख ३८ हजार ५०० रुपये एवढी आहे. हा प्रकार गेल्या दीड वर्षांपासून सुरू होता. विद्यापीठाच्या ‘सह्यगिरी वसतिगृहातील’ पहिल्या वर्षातील विद्यार्थ्यांकडून खानावळीच्या शुल्कासाठी तब्बल ५० हजार रुपये प्रति विद्यार्थी जमा करून घेण्यात येत होते. हा निधी विद्यापीठाच्या अधिकृत बँक खात्यात न भरता, कंत्राटी कर्मचाऱ्याने स्वतःच्या गुगल पेवरून जमा केले होते. दरम्यान, नव्याने प्रवेश घेतलेले विद्यार्थी व पालकांना कोणतीही शंका न येता रक्कम ट्रान्स्फर करत होता.
....................
विद्यार्थ्यांकडून दुप्पट फी आकारणी
- हॉस्टेलची फी ६,८९० रुपये असताना आरोपीने चक्‍क ६६,८९० हजार रुपये विद्यार्थ्यांकडून वसूल केले होते. विशेष म्‍हणजे विद्यार्थ्यांनी मोठी रक्कम भरली असताना, रेक्टर व मुख्य रेक्टर यांना दीड वर्षे काहीच कल्पना कशी नव्हती, असा प्रश्न आता उपस्थित होत आहे. वसतिगृहाच्या बँक व्यवहारांचे नियमित ऑडिट का झाले नाही, याबाबतही संशय व्यक्त होत आहे. या संपूर्ण प्रकरणामुळे विद्यापीठ प्रशासन, रेक्टर यंत्रणा आणि आर्थिक व्यवहारावरील देखरेखीच्या प्रक्रियेवर अनेक प्रश्नचिन्ह उपस्थित झाले आहेत.
......................
कोट
आरोपीला पाच दिवस पोलिस कोठडी देण्यात आली आहे. आरोपीने हे पैसे कुठे गुंतवले आहेत का किंवा काही खरेदी केली का याबाबतीत पोलिस तपास सुरू आहे.
- विजय सुर्वे, सहा. पोलिस निरीक्षक, गोरेगाव.