विरार (बातमीदार) : वसई तालुक्यातील महापालिकेमधून २०११ मधील तत्कालीन काँग्रेस सरकारच्या शासन निर्णयाने बाहेर असलेल्या २९ ग्रामपंचायती पालघर जिल्हा परिषदेमध्ये समाविष्ट करूनच सुधारित प्रारूप प्रभाग रचना प्रसिद्ध करावी, यासाठी जिल्हाधिकारी यांना वसई तहसीलदार कार्यालयातर्फे सूचना अर्ज आज (ता. २०) काँग्रेसतर्फे देण्यात आला. विजय गोविंद पाटिल आणि ॲड. जिमी मतेस गोन्सालवीस यांच्यातर्फे २९ ग्रामपंचायती जिल्हा परिषदेत समाविष्ट करण्यासंदर्भात अर्ज तहसीलदारांना सादर करण्यात आला. या वेळी जिल्हा काँग्रेस कार्यकारिणी तहसीलदार कार्यालयात हजर होती. वसईतील २९ गावांची महापालिकेमधून बाहेर पडण्याची ही शेवटची लढाई आहे. अधिकृतरित्या ही २९ गावे जवळजवळ १७ वर्षांनी जिल्हा परिषद व पंचायत समिती निवडणुकीत भाग घेतील व ग्रामपंचायतीचा दर्जा प्राप्त करतील, असे मत विजय पाटील यांनी व्यक्त केले.