फोटोसेशन नको, लोकलने प्रवास करा
आमदार राजेश मोरेंविरोधात समाजमाध्यमांत तक्रारींचा सूर
सकाळ वृत्तसेवा
डोंबिवली, ता. २० ः दुपारी तसेच रात्री कमी गर्दीच्या वेळी प्रवास करण्यापेक्षा सकाळी आठ ते ११ व सायंकाळी सहा ते नऊ या वेळेत प्रवास करून दाखवा, म्हणजे सामान्य प्रवासी कसा प्रवास करतो हे समजेल, अशा संतप्त प्रतिक्रिया रेल्वेप्रवाशांनी आमदार राजेश मोरे यांना समाजमाध्यमांवर पोस्ट केलेल्या फोटोवर केल्या आहेत. आमदार मोरे यांनी समाजमाध्यमांवर फोटो पोस्ट करताच प्रवाशांनी समस्यांचा पाढा वाचला. तसेच, आमदारांना सर्वसामान्य प्रवासी म्हणून प्रवास करून दाखवा, असे खडे बोल सुनावले.

डोंबिवली व कल्याणकडे संध्याकाळी रस्ते मार्गाने प्रवास करणे म्हणजे एक मोठे दिव्यच आहे. मुंब्रा बायपास, पनवेल मार्ग, कल्याण-शिळमार्ग पलावा पूल, मुंबई-नाशिक महामार्गावरील भिवंडी बाह्यवळण रस्ता, कोन ते दुर्गाडी पुलाचा मार्ग या सर्वच ठिकाणी वाहनांच्या गर्दीने रस्ते ठप्प होतात. मुंबईहून डोंबिवली, कल्याणकडे रस्तेमार्गे येण्यासाठी दीड ते दोन तास लागणाऱ्या प्रवासासाठी अनेकदा तीन ते चार तास जातात. त्यामुळे रोजच्या प्रवाशांची मोठी तारांबळ उडते. रस्ते मार्गांवरील ही अडचण लक्षात घेत कल्याण ग्रामीणचे आमदार राजेश मोरे यांनी दोन दिवसांपूर्वी मुंबईहून परतताना रस्त्याऐवजी लोकलने डोंबिवलीपर्यंत प्रवास केला. विधिमंडळ अधिवेशन आटोपल्यानंतर त्यांनी सीएसएमटीहून डोंबिवलीपर्यंत रेल्वेने प्रवास केला. या प्रवासादरम्यान काढलेली छायाचित्रे आणि प्रवाशांशी संवाद साधतानाचे फोटो आमदार मोरे यांच्या समर्थकांनी समाजमाध्यमांवर मोठ्या प्रमाणावर प्रसारित केले. हे प्रवासातील ‘फोटो सेशन’ सर्वसामान्य प्रवाशांच्या जिव्हारी लागलेले दिसते. नेहमीच धक्काबुक्की आणि गर्दीतून प्रवास करणाऱ्या महिला व पुरुष प्रवाशांनी आमदार मोरे यांच्यावर समाजमाध्यमांतून टीकेची झोड उठवली आहे.

‘आमदार साहेब, तुम्ही संध्याकाळच्या कमी गर्दीच्या वेळेत सामान्य डब्यातून प्रवास करून स्वतःला सामान्य प्रवासी म्हणता; पण सकाळी डोंबिवली रेल्वेस्थानकातून आठ ते अकरा वाजण्याच्या दरम्यानची लोकल पकडून दाखवा. तेव्हा समजेल, की प्रवाशांचे काय हाल होतात!’ अशा संतप्त प्रतिक्रिया प्रवाशांनी व्यक्त केल्या. त्यामध्ये काही महिलांनीही आपली वेगळी मागणी मांडली. त्यात महिलांसाठी स्वतंत्र वातानुकूलित लोकल सुरू करा, दिवा ते सीएसएमटी लोकल वाढवा, केवळ छायाचित्र काढून समाजमाध्यमांवर पोस्ट टाकून काही उपयोग नाही. स्वतः एकदा तरी सकाळच्या वेळेस प्रवास करा म्हणजे प्रवाशांचे दुःख काय आहे, हे तुम्हाला कळू शकेल. असे आपले मत अनेकांनी व्यक्त केले आहे. यावर आमदारांचे समर्थक मात्र गप्प बसल्याचे दिसून आले आहेत.

प्रवाशांना मरणयातना
आमदार मोरे यांच्या समर्थकांनी यावर कोणताही प्रतिवाद करण्याचा प्रयत्न केला नाही. प्रवाशांचा रोष इतका तीव्र होता, की त्याला उत्तर देणेही कठीण झाले आहे. तसेच सकाळी कार्यालयीन गर्दीत धक्काबुक्की सहन करणाऱ्या प्रवाशांनी आमदार मोरे यांना थेटच सांगितले, की खरंच जर प्रवाशांच्या अडचणी समजून घ्यायच्या असतील, तर दररोज सकाळी डोंबिवलीहून मुंबईपर्यंत लोकलने प्रवास करा, म्हणजे कळेल प्रवासी कशा मरणयातना भोगत आहेत.