मालमत्ता करासंदर्भात उद्धव ठकारे गटाकडून निवेदन
खारघर, ता. २० (बातमीदार) : पनवेल महापालिका प्रशासनाने मालमत्ता करावरील सर्व शास्ती माफ करावी, तसेच ग्रामपंचायत काळातील मालमत्तेचा अभ्यास करून तशी आकारणी करावी, अशा मागणीचे निवेदन उद्धव ठाकरे गटाच्या शिष्टमंडळाने पालिका आयुक्तांना दिले आहे.
पनवेल महापालिका प्रशासनाने अभय योजना लागू करून मालमत्ता करात सवलत देत नागरिकांना दिलासा दिला आहे. मात्र केवळ मालमत्ता करावरील शास्तीवर दंड कमी करण्यात आला आहे. दरम्यान, ग्रामपंचायत असताना काही भागांत सिडको वसाहतीत मालमत्ता कर आकारण्यात आले होते. या करांचा महापालिकेने अभ्यास करावा तसेच मालमत्ता करावरील संपूर्ण शास्ती माफ करावी, यासाठी शिवसेनेच्या शिष्टमंडळाने जिल्हाप्रमुख शिरीष घरत यांच्या सूचनेनुसार पालिका आयुक्त मंगेश चितळे यांची भेट घेऊन निवेदन दिले. या वेळी महानगरप्रमुख अवचित राऊत म्हणाले, की पनवेल महापालिका अस्तित्वात आल्यानंतर मालमत्ता कर लागू केला. या वेळी सदनिकाधारकांनी सिडकोकडे सेवा शुल्काचा भरणा केला आहे. ग्रामपंचायत काळात सिडको वसाहतीत लावण्यात आलेल्या मालमत्ता करांचा अभ्यास पालिकेने करावा. तसेच पालिकेकडून आकारण्यात आलेली संपूर्ण शास्ती माफ करावी, असे निवेदन शिवसेनेच्या शिष्टमंडळाने पालिका आयुक्तांना दिले आहे. या शिष्टमंडळात शिवसेना पनवेल महानगरप्रमुख अवचित राऊत, पनवेल शहरप्रमुख प्रवीण जाधव, खांदा कॉलनी शहरप्रमुख सदानंद शिर्के, कामोठे शहरप्रमुख रामदास गोवारी आदी शिवसैनिक सहभागी झाले होते.