मुलुंड (बातमीदार)ः लाला देवीदयाळ मार्गावरील टी वॉर्डजवळ आणि मान पंजाबी हॉटेलसमोरील पथदिव्याला वाहनाने धडक दिली होती. या अपघातामुळे विजेच्या तारांशी संपर्क होण्याची शक्यता होती; पण ही बाब स्थानिकांनी मुलुंडचे समाजसेवक शुलभ जैन यांच्या निदर्शनास आणून दिली होती. जैन यांनी घटनास्थळी धाव घेत मुलुंड महावितरणच्या अधिकाऱ्यांना सूचित केले. तसेच, वर्दळीच्या रस्त्यावर अपघात घडण्यापूर्वी दुरुस्तीचे काम सुरू करावे, अशी मागणी केली. महावितरणाच्या अधिकाऱ्यांनी घटनास्थळी पडलेला खांब तसेच वीजप्रवाह दुरुस्त करून पूर्ववत केला आहे. जैन यांनी दाखवलेली समसूचकता तसेच महावितरणने त्वरित केलेल्या कार्यवाहीमुळे मोठी दुर्घटना टाळता आली आहे.